बाँके वैशाख ३ गते।
बाँकेको राप्ती नदी किनारका बस्तीमा बसोबास गर्ने नागरिकहरूले नयाँ सरकारले बाढी तथा कटानको समस्या दीर्घकालीन रूपमा समाधान गर्ने अपेक्षा व्यक्त गरेका छन्।
वर्षायाममा राप्ती नदीमा आउने बाढी र तीव्र कटानका कारण राप्तीसोनारी, नरैनापुर र डुडुवा गाउँपालिकाका दर्जनौं बस्तीका हजारौं स्थानीय वर्षेनी जोखिममा पर्ने गरेका छन्।
राप्तीसोनारी–७ का शिवप्रसाद मौर्यले नदीको दुवै किनारमा पक्की तटबन्ध निर्माण भएमा बाढीको जोखिम न्यूनीकरण हुने विश्वास व्यक्त गरे। उनले विगतमा नदी नियन्त्रणका लागि पर्याप्त बजेट विनियोजन नभएको उल्लेख गर्दै नयाँ सरकारले जनसुरक्षालाई प्राथमिकतामा राख्ने आशा व्यक्त गरे।
गत वर्ष जनताको तटबन्धन कार्यक्रम अन्तर्गत लमहीबाट राप्तीसोनारी–७ को खल्ला झगडिया आसपास क्षेत्रमा पक्की तटबन्ध निर्माण गरिएको थियो। यसैगरी खल्ला झगडिया र जरैयामा बाँस प्रयोग गरी बेम्बो पाइलिङमार्फत कटान नियन्त्रणको प्रयास गरिएको भए पनि विभिन्न स्थानमा भइरहेका कटानका कारण ती उपाय पर्याप्त नभएको स्थानीयको भनाइ छ।
राप्ती नदीको तीव्र कटानका कारण राप्तीसोनारी र होलिया आसपासका क्षेत्रमा निर्माण गरिएका अस्थायी माटोका तटबन्ध भत्किने जोखिम बढेपछि बेम्बो पाइलिङ र थप तटबन्धन कार्य गरिएको हो।
हाल निरन्तर कटानका कारण राप्तीसोनारीका देउपुरा, पिप्रहवा, खल्ला झगडिया, भवानियापुर, गेदवा, नरैनापुर–६ का सोनबर्षा, कुदरबेटवा, गङ्गापुर, नरैनापुर–५ का भाजपुर, नेवाजी गाउँ तथा डुडुवा–१ को कुदवा गाउँ उच्च जोखिममा रहेका छन्।
Discussion about this post