बाँके वैशाख १ गते ।
बाँकेको नेपालगन्जस्थित नेपाल–भारत सीमाको जमुनाहा नाकामा भारत सरकारले निर्माण गरिरहेको अत्याधुनिक नेपाल–भारत मैत्रीद्वार अन्तिम चरणमा पुगेको छ।
भारतीय अधिकारीहरूका अनुसार भव्य र आधुनिक संरचनासहितको उक्त द्वार केही समयभित्रै औपचारिक रूपमा उद्घाटन गरिनेछ। यसले सीमा क्षेत्रमा आवागमन व्यवस्थापनलाई थप सहज बनाउने र समग्र सौन्दर्यमा समेत सकारात्मक प्रभाव पार्ने अपेक्षा गरिएको छ।
भारततर्फ आधुनिक द्वार निर्माण भएसँगै नेपालतर्फ रहेको पुरानो संरचनाको स्तरोन्नति गर्नुपर्ने माग पनि उठ्न थालेको छ। नागरिक सरोकार मञ्च बाँकेका संयोजक कृष्णप्रसाद श्रेष्ठले सीमा क्षेत्रको समग्र विकास र सन्तुलनका लागि नेपालतर्फको द्वारलाई पनि समयानुकूल पुनर्निर्माण गर्न आवश्यक रहेको बताए।
स्थानीय सरोकारवालाहरूले दुवै देशबीचको मैत्री र सहकार्यलाई प्रतिबिम्बित गर्ने गरी पूर्वाधार विकासमा समन्वय आवश्यक रहेको उल्लेख गरेका छन्।
Discussion about this post