बाँके वैशाख २१ गते ।
बाँकेको खजुरा क्षेत्रमा निर्माणाधीन सडक फराकिलो बनाउनुपर्ने माग उठेको छ। स्थानीय बासिन्दाले हुलाकी राजमार्ग निर्देशनालय योजना कार्यालय, नेपालगन्जमा पुगेर ज्ञापनपत्र बुझाउँदै सडकको चौडाइ बढाउन आग्रह गरेका हुन्।
करिब नौ वर्षअघि सुरु भई लामो समय अलपत्र परेको उक्त सडक पुरानो ठेक्का तोडेर नयाँ प्रक्रियामार्फत पुनः निर्माण थालिएको हो। खजुरा बजार क्षेत्रमा एक हजार ८०० मिटर लम्बाइको चार लेन सडक पुरानै मापदण्डअनुसार निर्माण गर्न लागिएको भन्दै स्थानीयले यसले सडक साँघुरो हुने चिन्ता व्यक्त गरेका छन्।
स्थानीय तथा अग्रज पत्रकार शरण कर्माचार्यका अनुसार साँघुरो सडकका कारण दुर्घटनाको जोखिम बढ्ने भएकाले सडक विस्तार आवश्यक देखिएको हो। उनले निर्माणकै चरणमा केही थप चौडाइ गरिनुपर्नेमा सम्बन्धित निकायको ध्यानाकर्षण गराइएको बताए।
स्थानीयको मागअनुसार सडकको दुवैतर्फ एक–एक मिटर थप गरी कुल चौडाइ नौ मिटर कायम गर्न तथा पदमार्ग (फुटपाथ) नालीभन्दा बाहिर राखेर निर्माण गर्नुपर्ने प्रस्ताव गरिएको छ।
हुलाकी राजमार्ग निर्देशनालय योजना कार्यालय, नेपालगन्जका प्रमुख लीलाबहादुर भण्डारीले स्थानीयको मागप्रति सकारात्मक रहेको जनाउँदै आवश्यक स्वीकृतिका लागि माथिल्लो निकायमा प्रस्ताव पठाइने जानकारी दिए। तर, यसअघि निर्माण गरिएका संरचनासम्बन्धी मुद्दा अदालतमा विचाराधीन रहेकाले प्राविधिक जटिलता देखिएको उनले बताए।
सडक डिभिजन कार्यालय, नेपालगन्जका अनुसार २०७४ साल चैत २९ गते गजुरमुखी कन्स्ट्रक्सन कम्पनी प्रालि, इलामसँग बाँकेको खजुरा बजारमा एक हजार ८०० मिटर र बर्दियाको गुलरियामा दुई हजार २०० मिटर सडक निर्माणका लागि २१ करोड ४९ लाख रुपैयाँमा सम्झौता भएको थियो। उक्त आयोजना २०७७ चैतमै सम्पन्न हुनुपर्ने भए पनि पटक–पटक म्याद थप्दा समेत काम पूरा हुन सकेन।
ठेक्का प्रक्रिया तोडिएपछि निर्माण कम्पनी अदालत गएको थियो। अदालतबाट अन्तरिम आदेश जारी नभएपछि हुलाकी सडक आयोजनाले स्थानीयको मागअनुसार पुनः निर्माण कार्य अघि बढाएको जनाइएको छ।
Discussion about this post