बाँके, जेठ ८ गते ।
राष्ट्रिय स्वतन्त्र पार्टी नेपालगन्ज उप–महानगरपालिकाको स्वास्थ्य विभाग प्रमुखमा दन्त चिकित्सक डा. प्रतिक श्रेष्ठ मनोनयन भएका छन् । राष्ट्रिय स्वतन्त्र पार्टी नेपालगन्ज उप–महानगरपालिका नगर समितिले उनलाई स्वास्थ्य विभाग प्रमुखमा मनोनयन गरेको हो ।
नेपालगन्जमा शुक्रवार आयोजित कार्यक्रममा जिम्मेवारी सौरभ कर्माचार्यलाई उद्योग तथा वाणिज्य विभाग प्रमुख र किरणकुमार श्रेष्ठलाई युवा तथा खेलकुद विभाग प्रमुखको जिम्मेवारी दिइएको नगर सभापति नविन खड्काले जानकारी दिए । सो अवसरमा काम र दक्षताको आधारमा २९ जनालाई विभिन्न विभागको जिम्मेवारी दिइएको उनले बताए ।
रास्वपा लुम्बिनी प्रदेश संगठन विभाग प्रमुख सिएम उपाध्यायको प्रमुख आतिथ्यतामा भएको मनोनयन पत्र वितरण कार्यक्रममा उनले जनताको भावना अनुसार काम गर्न विभागिय प्रमुखसँग आग्रह गरे । ‘जनतासँग प्रत्यक्ष सरोकार राख्ने काममा सरिक हुनु होला । जनताभन्दा माथि कोही पनि छैन । जनतासँग प्रत्यक्ष जोडिने नीति पार्टीको छ,’ उनले भने ।
शुभकामना मनतब्य राख्दै रास्वपा बाँके क्षेत्र नं. २ का सभापति विवेककुमार श्रेष्ठले पार्टीको नीति र विचार अनुसार अगाडी बढ्न आग्रह गरे । उनले भने, ‘तपाईहरुको काम र दक्षताको आधारमा पार्टीले जिम्मेवारी दिएको छ । पार्टीलाई फाइदा पुग्ने गरि काम गर्नुपर्ने छ ।’
सभापतिको आशनबाट नगर सभापति नविन खड्काले आफूले पाएको जिम्मेवारी पूरा गर्न हरसम्भवको प्रयास गर्न आग्रह गरे । ‘तपाईहरु आ–आफ्नो जिम्मेवारी पूरा गर्न लाग्नुस । तपाईहरुलाई परेको समस्यामा पार्टीले साथ, सहयोग गर्ने छ,’ उनले भने ।
मुना हमालले संचालन गरेको कार्यक्रममा लुम्विनी प्रदेश संगठन विभाग प्रमुख सिएम उपाध्याय र नगर सभापति नविन खड्काले विभागिय प्रमुखहरुलाई नगर विभाग मनोनयन पत्र प्रदान गरेका थिए ।
Discussion about this post