बाँके, जेठ ९ गते ।
बाँके जिल्लामा पछिल्ला केही दिनयता तातो हावा (लु) चल्न थालेसँगै अत्यधिक गर्मी बढेको छ । आगोजस्तै पोल्ने तातो हावाका कारण बाँकेसहित पश्चिम तराईका जिल्लाहरूको जनजीवन प्रभावित बनेको हो ।
बिहानैदेखि घाम अत्यधिक चर्किने, शरीर पोल्ने गरी तातो हावा चल्ने तथा अत्यधिक पसिनाका कारण सर्वसाधारण दैनिक कामकाज गर्नसमेत कठिनाइ महसुस गरिरहेका छन् । बिहान ७ बजेदेखि नै गर्मीको प्रभाव बढ्न थालेपछि बजार क्षेत्रदेखि ग्रामीण बस्तीसमेत प्रभावित बनेका छन् ।
अत्यधिक गर्मीका कारण दिउँसोको समयमा सर्वसाधारणको आवतजावत घटेको छ भने बजार क्षेत्र सुनसान देखिन थालेका छन् । नेपालगन्ज त्रिभुवन चोकका व्यवसायी अतुल गुप्ताले धेरै वर्षपछि जेठ महिनाको सुरुमै यस्तो प्रकारको भीषण गर्मी अनुभव गरिएको बताए । उनका अनुसार चर्को गर्मीका कारण मानिसहरू अत्यावश्यक कामबाहेक घरबाहिर निस्कन छाडेका छन् ।
नागरिक सरोकार मञ्च बाँकेका संयोजक कृष्णप्रसाद श्रेष्ठले एक्कासी बढेको तापक्रम र तातो हावाले जनजीवन अस्तव्यस्त बनाएको बताए । उनले विशेषगरी दैनिक ज्यालादारी मजदुर, रिक्सा तथा ठेला चालकजस्ता श्रमिक वर्ग सबैभन्दा बढी प्रभावित भएको उल्लेख गरे ।
दैनिक मजदुरी गरेर जीविकोपार्जन गर्नेहरूका लागि चर्को गर्मी ठूलो चुनौती बनेको छ । अत्यधिक तापका कारण दिउँसोको समयमा काम गर्न कठिन भइरहेको मजदुरहरूले बताएका छन् ।
नेपालगन्ज–६ का अटो रिक्सा चालक सलिम खानले गर्मीका कारण सडकमा यात्रु कम निस्कने भएकाले आम्दानीमा प्रत्यक्ष असर परेको बताए । उनका अनुसार सामान्यतया व्यस्त रहने सडक र चोकहरू समेत अहिले दिउँसो सुनसान देखिन थालेका छन् ।
उता चिकित्सकहरूले अत्यधिक गर्मी र तातो हावाबाट बच्न आवश्यक सतर्कता अपनाउन आग्रह गरेका छन् । भेरी अस्पतालका चिकित्सक डा. पारस श्रेष्ठले दिउँसोको समयमा सकेसम्म घरबाहिर ननिस्कन, चिसो स्थानमा बस्न तथा अत्यावश्यक काममा बाहिर निस्कँदा टाउको छोप्ने, टोपी प्रयोग गर्ने र हल्का सुती कपडा लगाउन सुझाव दिए ।
उनले शरीरमा पानीको कमी हुन नदिन पटक–पटक पानी, जुस तथा अन्य झोल पदार्थ सेवन गर्न पनि सर्वसाधारणलाई आग्रह गरेका छन् ।
Discussion about this post