बाँके, असार ३१ गते ।
भारतसँगको प्रमुख सीमा नाका जमुनाहबाट सशस्त्र प्रहरीले स्रोत नखुलेको पाँच लाख भारतीय रुपैयाँ बरामद गरेको छ।
सशस्त्र प्रहरी बल, नेपाल सीमा सुरक्षा गुल्म जमुनाहबाट खटिएको टोलीले नेपालगन्ज उपमहानगरपालिका–१५ स्थित जमुनाह नाकामा नियमित सुरक्षा जाँचका क्रममा भारतबाट नेपालतर्फ आउँदै गरेको साइकल रिक्सामा राखिएको सामानको बोरा खानतलासी गर्दा उक्त रकम फेला पारेको हो।
सशस्त्र प्रहरी बल नेपाल नं. ३० गण बागेश्वरी हेडक्वार्टर बाँकेका सूचना अधिकारी सशस्त्र प्रहरी नायब उपरीक्षक मोहन विष्टका अनुसार बरामद गरिएको रकमको स्वामित्व कसैले दाबी नगरेकाले बेवारिसे अवस्थामा फेला परेको मानिएको छ।
बरामद गरिएको पाँच लाख भारतीय रुपैयाँ आवश्यक अनुसन्धान तथा कानुनी कारबाहीका लागि नेपालगन्ज भन्सार कार्यालयमा बुझाइएको उनले जानकारी दिए।
भारतसँग खुला सीमा जोडिएको बाँकेको जमुनाह नाका पछिल्लो समय अवैध सामान ओसारपसार, भन्सार छली तथा स्रोत नखुलेका नगदको आवतजावतका हिसाबले सुरक्षा निकायको विशेष निगरानीमा रहेको छ। सशस्त्र प्रहरीका अनुसार सीमा क्षेत्रमा नियमित जाँच र गस्ती प्रभावकारी बनाइएपछि यस्ता प्रकृतिका बरामदका घटना बढेका छन्।
सशस्त्र प्रहरी बल नेपाल नं. ५ विन्ध्यावासिनी बाहिनीका बाहिनीपति सशस्त्र प्रहरी नायब महानिरीक्षक दीपक अधिकारीले कमान्ड सम्हालेपछि लुम्बिनी प्रदेशका भारतसँग सीमा जोडिएका जिल्लामा अवैध गतिविधिविरुद्ध निगरानी थप कडा पारिएको सशस्त्र प्रहरीको दाबी छ।
नायब महानिरीक्षक अधिकारीले सीमा अपराध, तस्करी तथा गैरकानुनी कारोबार नियन्त्रणलाई प्राथमिकतामा राखेर विशेष योजना र रणनीतिअनुसार जनशक्ति परिचालन गरिएको बताए। उनका अनुसार सीमा क्षेत्रमा हुने अवैध गतिविधि नियन्त्रण गर्न सशस्त्र प्रहरी चौबीसै घण्टा निगरानी र गस्तीमा खटिएको छ।
यद्यपि, बरामद गरिएको रकम कसले ल्याएको थियो, कसका लागि ल्याइएको थियो वा यसको उद्देश्य के थियो भन्ने विषयमा अनुसन्धान जारी रहेको सुरक्षा स्रोतले जनाएको छ।
Discussion about this post