प्युठान, असार २९ गते ।
जिल्ला प्रहरी कार्यालय प्युठानले चालु आर्थिक वर्षमा जिल्लाका विभिन्न स्थानबाट ८० थान भरुवा बन्दुक बरामद गरेको छ। प्रहरीले भरुवा बन्दुकसँगै तीन थान पेस्तोलसमेत नियन्त्रणमा लिएको जनाएको छ।
जिल्ला प्रहरी कार्यालय प्युठानका प्रमुख प्रहरी नायब उपरीक्षक नरहरि अधिकारीका अनुसार विभिन्न घटनामा प्रयोग भएका तथा लुकाइछिपाइ राखिएका हातहतियार विशेष अभियानका क्रममा बरामद गरिएका हुन्।
“विगत करिब छ महिनायता जिल्लाका विभिन्न स्थानबाट हातहतियार बरामद भएका छन्,“ प्रहरी नायब उपरीक्षक अधिकारीले भने, “बरामद भएका हतियारमध्ये केही प्रयोगयोग्य अवस्थामा छन् भने केही प्रयोग गर्न नमिल्ने अवस्थामा रहेका छन्।“
प्रहरीका अनुसार इजाजतबिनाका हातहतियार नियन्त्रणमा आएपछि जिल्लामा हुने आपराधिक गतिविधिका साथै सिकार खेल्ने क्रममा हुने घटनासमेत न्यूनीकरण हुने अपेक्षा गरिएको छ।
“सिकार खेल्ने क्रममा पनि विभिन्न घटना हुने गरेका छन्,“ अधिकारीले भने, “अवैध हातहतियार नियन्त्रणमा लिएपछि यस्ता घटनामा कमी आउने विश्वास गरेका छौं।“
जिल्ला प्रहरी कार्यालयका अनुसार चालु आर्थिक वर्षमा अवैध हातहतियारसम्बन्धी तीन वटा मुद्दा दर्ता भएका छन्।
Discussion about this post