कैलालीे, साउन १४ गते ।
कैलाली र कञ्चनपुरका केरा उत्पादकले बगानबाट प्रतिदर्जन ६०–६५ रुपैयाँमा बिक्री भइरहेको केरा बजारमा अस्वाभाविक रूपमा महँगो भएको भन्दै प्रभावकारी बजार अनुगमन गर्न सरकारसँग आग्रह गरेका छन् ।
केरा उत्पादक संघ कैलाली र केरा उत्पादक तथा व्यवसायी संघ कञ्चनपुरले बुधबार संयुक्त पत्रकार सम्मेलन गरी भारतबाट केराको बिरुवा तथा फल आयातमा रोक लगाउने सरकारको निर्णयको स्वागत गर्दै अब कालोबजारी, कृत्रिम अभाव र अनुचित मूल्यवृद्धि नियन्त्रणमा ध्यान दिन आग्रह गरेका हुन् ।
संघले कैलाली र कञ्चनपुरमा बगानबाट बिक्री हुने काँचो केराको सिफारिस मूल्यसमेत सार्वजनिक गरेको छ । भदौ–असोजमा प्रतिदर्जन ५५–६५ रुपैयाँ, कात्तिक–मंसिरमा ४५–५० रुपैयाँ र पुस–माघमा ३०–३५ रुपैयाँ मूल्य तोकिएको छ । फागुनदेखि साउनसम्मको मूल्य उत्पादन र बजारको अवस्था हेरेर तय गरिने जनाइएको छ ।
‘बगान बिक्री मूल्य कार्यान्वयनमा सहयोग गरी किसान र उपभोक्ता दुवैको हित सुरक्षित गर्नुपर्छ,’ केरा उत्पादक संघ कैलालीका अध्यक्ष दीपेन्द्र थारुले भने । संघले बजारमा भइरहेको अस्वाभाविक मूल्यवृद्धि रोक्न सरकारी निकायलाई नियमित अनुगमन गर्न आग्रह गरेको छ ।
कृषि गणना २०६८/६९ अनुसार सुदूरपश्चिममा करिब २ हजार ४ सय हेक्टरमा केराखेती हुँदै आएको छ । कैलालीमा करिब १ हजार ८ सय ५० र कञ्चनपुरमा ६ सय १० हेक्टरमा केराखेती हुने गरेको संघ कञ्चनपुरका अध्यक्ष सुरेन्द्रकुमार चौधरीले बताए ।
Discussion about this post