बाँके, भदौ १२ गते ।
रसुवा र नुवाकोट आसपासमा काम तथा अन्य सिलसिलामा रहेका बाँकेका २७ जना भोटेकोशी नदीमा आएको बाढीपछि सम्पर्कविहीन भएका छन् ।
बाँकेका सहायक प्रमुख जिल्ला अधिकारी महेशकुमार गुरुङका अनुसार सम्पर्कविहीन भएका व्यक्तिका आफन्तले खोज तथा उद्धारका लागि स्थानीय प्रशासनलाई जानकारी गराएका छन् । सम्पर्कविहीन हुनेमा १४ पुरुष र १३ महिला छन् ।
प्रशासनका अनुसार सम्पर्कविहीन २७ जनामध्ये २० जना बाँकेका स्थायी बासिन्दा हुन् । पाँच जना अन्य जिल्लाबाट बाँकेमा बसोबास गर्दै आएका र दुई जना भारतीय नागरिक रहेको जनाइएको छ ।
सम्पर्कविहीन हुनेहरूमा रसुवा भन्सार कार्यालय, विभिन्न सुरक्षा निकाय तथा जलविद्युत् आयोजनामा कार्यरत व्यक्तिहरू छन् । गोसाइँकुण्ड क्षेत्रमा व्यवसाय गर्दै आएका तथा कैलाश मानसरोवर तीर्थयात्राका लागि पुगेका बाँकेका सर्वसाधारणसमेत सम्पर्कविहीन भएको प्रशासनले जनाएको छ ।
बाढीपछि उनीहरूको अवस्था अज्ञात रहेकाले खोज तथा उद्धारका लागि सम्बन्धित निकायसँग समन्वय भइरहेको सहायक प्रमुख जिल्ला अधिकारी गुरुङले बताए ।
Discussion about this post