काठमाडौें, भदौ २६ गते ।
बाँके क्षेत्र नम्बर ३ बाट निर्वाचित राष्ट्रिय स्वतन्त्र पार्टी (रास्वपा) का सांसद खगेन्द्र सुनारले नेपाल प्रहरीका महानिरीक्षक दानबहादुर कार्कीलाई बर्खास्त गर्न सरकारसँग माग गरेका छन् ।
शुक्रबार प्रतिनिधिसभाको शून्य समयमा बोल्दै सांसद सुनारले आईजीपी कार्कीमाथि करोडौँ रुपैयाँ भ्रष्टाचार गरेको आरोप लागेको भन्दै छानबिन गर्न सरकारको ध्यानाकर्षण गराएका हुन् ।
‘तल्लो दर्जाका प्रहरीहरूको जुत्ता, मोजा खाइदिएको आरोप उहाँमाथि लागेको छ । करोडौँ करोड भ्रष्टाचार गरेको आरोप उहाँमाथि लागेको छ,’ उनले भने, ‘यो सरकार उहाँलाई बर्खास्त किन गरिरहेको छैन ? उहाँमाथि छानबिन किन भइरहेको छैन ? के कारणले उहाँलाई बचाइराखिएको छ ?’
उनले कार्कीविरुद्ध अख्तियार दुरुपयोग अनुसन्धान आयोगदेखि संसद्को सार्वजनिक लेखा समितिसम्म भ्रष्टाचारसम्बन्धी उजुरी परेको दाबी गरे । ‘सामान्य आरोपको भरमा अहिलेसम्म तीन जना मन्त्री बर्खास्तमा परिसक्नुभएको छ । तर, करोडौँ भ्रष्टाचार गरेको आरोप अहिलेका नेपाल प्रहरीका महानिरीक्षक दानबहादुर कार्की, उहाँकी श्रीमतीलगायत ठूला अधिकारीमाथि लागेको छ,’ उनले भने ।
कार्कीविरुद्ध भ्रष्टाचारसम्बन्धी उजुरीहरू अख्तियारदेखि सार्वजनिक लेखा समितिसम्म चाङमाथि चाङ थपिँदै गएको सुनारको दाबी छ । उनले महानिरीक्षक कार्कीमाथि लागेको आरोपको निष्पक्ष छानबिन गर्न र आरोप पुष्टि भए कानुनअनुसार कारबाही गर्न सरकारसँग माग गरे ।
Discussion about this post