बाँके, भदौ २८ गते ।
भेरी अस्पताल नेपालगन्जमा कम्तीमा ५० शव अट्ने क्षमताको शवगृह निर्माण तथा विस्तार गरिने भएको छ । बाढी, पहिरो, भूकम्पलगायत विपद्का बेला एकैपटक ठूलो संख्यामा शव आउन सक्ने अवस्थालाई ध्यानमा राख्दै स्वास्थ्य तथा खाद्य स्वच्छता मन्त्रालयले क्षमता विस्तारको निर्णय गरेको हो ।
हाल अस्पतालको शवगृहमा एकैपटक ६ वटा शव मात्र राख्न सकिन्छ । मन्त्रालयले क्षमता बढाएर कम्तीमा ५० शव व्यवस्थापन गर्न सकिने शवगृह निर्माणका लागि परिपत्र पठाएको अस्पतालका मेडिकल सुपरिटेन्डेन्ट डा. नवीन दर्नालले बताए ।
‘अहिले ६ जनाको शव व्यवस्थापन गर्न सकिने अवस्था छ । क्षमता बढाएर ५० पु¥याउने निर्णय भएको छ,’ उनले भने, ‘बजेट भने आएको छैन । अस्पताल विकास समितिको निर्णयपछि विस्तृत परियोजना बनाएर बजेट माग गरिनेछ ।’
पश्चिम नेपालकै प्रमुख रेफरल अस्पताल भएकाले सामान्य अवस्थामा पनि यहाँ शव आउने क्रम तुलनात्मक रूपमा बढी हुन्छ । तर विपद्का बेला एकैपटक धेरै शव आउँदा सुरक्षित राख्ने ठाउँको अभाव हुन सक्ने भएकाले क्षमता विस्तार गर्न लागिएको दर्नालले बताए । भोटेकोशी बाढीबाट समेत शव व्यवस्थापनमा पूर्वतयारी आवश्यक रहेको सिकाइ भएको उनले बताए ।
अस्पताल विकास समितिका कार्यवाहक अध्यक्ष डक्ट धितालले नयाँ शवगृह बनेपछि शवको सुरक्षित र सम्मानजनक व्यवस्थापनसँगै पहिचान, परीक्षण तथा कानुनी प्रक्रिया अघि बढाउन सहज हुने बताए । उनका अनुसार यसले विपद्का बेला अस्पतालको प्रतिकार्य क्षमता र फरेन्सिक सेवासमेत बलियो बनाउनेछ ।
भेरी अस्पतालसँग आवश्यक संरचना निर्माणका लागि पर्याप्त जमिन रहेको अस्पतालले जनाएको छ । सरकारको निर्णयलाई छिटो कार्यान्वयनमा लैजाने तयारी भइरहेको छ ।
Discussion about this post