सल्यान मंसिर ९ गते ।
सल्यानको दानवाङमा पहिलो पटक विद्युत विस्तार भएको छ । संघीय सरकारबाट विनियोजित १ करोड ५८ लाख रुपैयाँको बजेट अन्तर्गत कपुरकोट गाउँपालिका वडा नम्बर २ दानवाङमा विजुली बत्ती बलेको हो । सोमबार पूर्व सामान्य प्रशासन मन्त्री तथा प्रतिनिधीसभा सांसद टेक बहादुर वस्नेतले विद्युत लाई प्रशार तथा वितरण कार्यक्रमको उद्घाटन गरेका छन् । कार्यक्रमका प्रमुख अतिथी समेत रहेका वस्नेतले जिल्लाभर सम्पूर्ण वस्तीमा विद्युत पुर्याउने कार्यलाई तिब्रताका साथ अगाडी बढाइएको बताए ।
उनले गाउँमा आएको विद्युतलाई उपयोग गरेर आर्थिक उपार्जनमा लाग्नुपर्ने बताए । वस्नेतले स्थानीय सरकारको पुँजीले नभ्याउने योजनाहरुलाई संघीय सरकारले महत्वका साथ कार्यान्वयन गर्ने जनाउँदै स्थानीय सरकारलाई बलियो बनाउन सकिएमा मात्रै समृद्धि हाँसिल गर्न सकिने धारणा राखे । कार्यक्रममा कपुरकोट गाउँपालिका उपाध्यक्ष तिला बुढा मगरले पालिकाभित्रका सबै वस्तीमा विद्युत विस्तार गर्ने योजना रहेको उल्लेख गर्दै स्थानीय सरकारले खानेपानी, सडक, स्वास्थ्य, शिक्षा, कला संस्कृतीको क्षेत्रमा पनि लगानी गरिरहेको जनाइन् ।
कार्यक्रममा कपुरकोट गाउँपालिकाका प्रमुख प्रशसकीय अधिकृत हिरालाल भण्डारी, साहित्यकार भद्र सिंह बुढा, कपुरकोट २ का वडाध्यक्ष मान बहादुर राना, १ का वडाध्यक्ष बालाराम खड्का लगाएतले बोल्दै विकट भनीएका बस्तीमा पनि विद्युत सेवा पुग्नु खुसिको विषय भएको बताएका थिए ।
विद्युत विस्तार कार्यक्रममा नेकपा कपुरकोटका सचिव तिर्थराज वस्नेत, कपुरकोट २ का वडा सदस्यहरु तेज बहादुर थापा सिरीस, लिल बहादुर घर्ती, वीवा कामी, खेलकुद विकास समिती कपुरकोटका अध्यक्ष द्रोण केसी, विरेन्द्र मावि कपुरकोटका प्रअ डिल बहादुर नेपाली, पत्रकार महासंघ कर्णालीका सदस्य सन्तोष घर्ती, प्रहरी चौकी कपुरकोटका इन्चार्ज दान बहादुर मल्ल, कपुरकोट बजार व्यवस्थापन समितीका अध्यक्ष रुपक बुढा, हेप्की डो संघ सल्यानका अध्यक्ष शेर बहादुर पुन, सरस्वती आधारभुत विद्यालय दानवाङका अध्यक्ष इश्वर बुढा लगाएतको सहभागीता थियो ।
पहिलो पटक गाउँमा विद्युत विस्तार भएको खुसियालीमा स्थानीयहरुले सोरठी र लहरे नाच प्रस्तुत गरेका थिए ।
Discussion about this post