काठमाडौं, असोज ८ गते ।
पूर्वराष्ट्रपति विद्यादेवी भण्डारी नेकपा (एमाले) को सक्रिय राजनीतिमा फर्किएकी छन्। एमाले केन्द्रीय कमिटीको तेस्रो बैठकले उनलाई वरिष्ठ नेताको जिम्मेवारी दिने सचिवालयको प्रस्ताव अनुमोदन गरेसँगै भण्डारी पार्टी राजनीतिमा फर्किएकी हुन्।
बिहीबार बसेको एमाले सचिवालय बैठकले भण्डारीलाई वरिष्ठ नेता बनाउने प्रस्ताव गरेको थियो। उक्त प्रस्तावलाई केन्द्रीय कमिटी बैठकले अनुमोदन गरेको हो।
भण्डारी २०७२ कात्तिकमा पहिलोपटक राष्ट्रपति निर्वाचित भएकी थिइन्। २०७४ मा दोस्रो कार्यकालका लागि पनि राष्ट्रपति निर्वाचित भएकी उनी २०७९ फागुन २५ गते रामचन्द्र पौडेल राष्ट्रपति निर्वाचित भएपछि पूर्वराष्ट्रपति बनेकी थिइन्। राष्ट्रपति बन्नुअघि उनी एमालेकी उपाध्यक्ष थिइन्।
राष्ट्रपति पदबाट बिदा भएपछि भण्डारी पार्टी राजनीतिमा फर्कने विषयमा चर्चा हुँदै आएको थियो। एमाले सचिव हिक्मत कार्कीले उनको राजनीतिक तथा सांगठनिक अनुभव पार्टीका लागि उपयोगी हुने बताए। सचिव पद्मा अर्यालले भण्डारीलाई पार्टी सदस्यका रूपमा मात्र नराखी वरिष्ठ नेताको जिम्मेवारी दिइएको बताइन्।
यसैगरी एमाले केन्द्रीय कमिटी बैठकले ३३ जना केन्द्रीय सदस्य मनोनीत गरेको छ। मनोनीत हुनेमा काशीनाथ अधिकारी, देवराज घिमिरे, हरि रिजाल, पासाङ शेर्पा, नरेन्द्र भट्टराई, नाथुराम देवकोटा, धर्म गिरी, नारायण घर्ती, विद्यासुन्दर शाक्य, पाल्देन छोपाङ, शान्तिलाल महत, विनोद पाण्डे, प्रेम दङ्गाल, पुष्पराज श्रेष्ठ, विमला घिमिरे, श्रीमाया थकाली, जानुका सिंखडा, बिना बास्तोला, कौशिला खत्री र सुरेन्द्र उदास छन्।
अन्य पार्टीबाट एमालेमा आएका मोहम्मद इस्तियाक राई, प्रदीप यादव, अब्दुल हुसेन, डिबी कार्की, भवानी खापुङ, दीपक खम्बु, जय गोदे, धर्मराज निरौला, ददी चाम्लिङ, विनोद पहाडी, रामप्रित पासवान र ध्रुव विस्टलाई पनि केन्द्रीय सदस्य मनोनीत गरिएको छ।
Discussion about this post