८०८ ग्राम लागूऔषधसहित तीन भारतीय नागरिक पक्राउ

बाँके असोज १३ गते ।
बाँकेको नेपालगन्जबाट ८०८ ग्राम लागूऔषध खैरो हेरोइनसहित तीनजना भारतीय नागरिक पक्राउ परेका छन्।

भारतबाट लागूऔषध खैरो हेरोइन ल्याएर नेपालका विभिन्न स्थानमा बिक्री–वितरण गर्ने गरेको सूचनाका आधारमा उनीहरूलाई पक्राउ गरिएको प्रहरीले जनाएको छ।

लागूऔषध नियन्त्रण ब्युरो शाखा कार्यालय नेपालगन्ज र जिल्ला प्रहरी कार्यालय बाँकेबाट खटिएको संयुक्त प्रहरी टोलीले मंगलबार नेपालगन्ज उपमहानगरपालिका–२ स्थित एक होटलबाट उनीहरूलाई पक्राउ गरेको हो।

पक्राउ पर्नेमा भारत उत्तर प्रदेश, बहराइचका २१ वर्षीय रिजवान अहमद इदरीशी, १८ वर्षीय माज अहमद र २६ वर्षीय रफत खान रहेको प्रहरीले जनाएको छ।
उनीहरूको साथबाट ८०८ ग्राम लागूऔषध खैरो हेरोइन बरामद भएको प्रहरीले बताएको छ। प्रहरीले युपी ३२ एफएच २६७९ भारतीय नम्बर प्लेटको एउटा स्कुटर र दुई थान मोबाइलसमेत बरामद गरेको जनाएको छ।