महेन्द्रनगर, असोज १४ गते ।
कञ्चनपुरको महाकाली नदीमा रहेको दोधारा–चाँदनी जोड्ने झोलुङ्गे पुलको एउटा पिल्लर भाँचिएपछि आवागमन रोकिएको छ ।
जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतका अनुसार बुधबार बिहान महाकाली नदीमा पानीको बहाव बढेका कारण पुलको दोधारातर्फको पिल्लर भाँचिएको हो । पिल्लर भाँचिएपछि पुलको करिब पाँचदेखि छ मिटर भाग उठेको उनले बताए ।
‘पुलमा आवागमन रोकिएको छ । सुरक्षाका लागि प्रहरी टोली परिचालन गरिएको छ,’ रावतले भने, ‘क्षतिग्रस्त भाग मर्मत गर्नुपर्ने अवस्था देखिएको छ ।’
भीमदत्त नगरपालिका–१३ का वडाध्यक्ष रामबहादुर बोहराले पानीको बहावका कारण बिहान पुलको पिल्लर भाँचिएको बताए । पिल्लर भाँचिएपछि पुलबाट हुने आवागमन पूर्ण रूपमा रोकिएको उनले बताए ।
उनका अनुसार पुलको अवस्थाबारे प्राविधिक टोलीबाट निरीक्षण गराउने तयारी भइरहेको छ । पुलको क्षतिको अवस्था हेरेपछि मर्मतको प्रक्रिया अघि बढाइने उनले बताए ।
करिब दुई दशकअघि निर्माण भएको उक्त झोलुङ्गे पुलले भीमदत्त नगरपालिका र दोधारा–चाँदनी नगरपालिकालाई जोड्दै आएको छ । पुल सञ्चालनमा आएपछि दोधारा–चाँदनी क्षेत्रका बासिन्दाको आवागमन सहज हुनुका साथै उक्त क्षेत्रको मुलुकको मूलधारसँगको सम्पर्कसमेत सहज भएको थियो ।
पुलमा क्षति पुगेपछि स्थानीय बासिन्दा तथा यात्रुलाई आवतजावतमा समस्या भएको छ ।
Discussion about this post