बाँके, असोज १४ गते ।
जेनजी आन्दोलनका क्रममा बाँकेका दुई बाल सुधार गृह र एउटा कारागारबाट भागेका १६९ जना बालबन्दी तथा कैदी अझै फरार रहेका छन् । आन्दोलनका क्रममा जिल्लाबाट ३४० जना बालबन्दी तथा कैदी भागेका थिए । तीमध्ये हालसम्म १७१ जना पक्राउ परेका छन् ।
बैजनाथ गाउँपालिकास्थित नौबस्ता बाल सुधार गृह, डुडुवास्थित जयेन्दु बाल सुधार गृह र नौबस्ता क्षेत्रीय कारागारबाट उनीहरू भागेका थिए ।
जयेन्दु बाल सुधार गृहका प्रमुख किशोर शर्माका अनुसार आन्दोलनका बेला सुधार गृहमा रहेका २२८ जनामध्ये ११५ जना भागेका थिए । भागेकामध्ये हालसम्म ६८ जना पक्राउ परेका छन् । अझै ४७ जना फरार रहेको उनले बताए ।
नौबस्ता बाल सुधार गृहका प्रमुख श्यामबहादुर रानाले सुधार गृहमा रहेका १७६ जनामध्ये ७८ जना भागेको बताए । प्रहरीसँगको झडपका क्रममा पाँच बालबन्दीको मृत्यु भएको उनको भनाइ छ । भागेकामध्ये ४७ जना पक्राउ परिसकेको र ३१ जनाको खोजी भइरहेको उनले बताए ।
यसैगरी नौबस्ता क्षेत्रीय कारागारबाट भागेका १४७ कैदीमध्ये हालसम्म ५६ जना पक्राउ परेका छन् । १८ जना विदेशी नागरिकसहित ९१ जना अझै फरार रहेको क्षेत्रीय कारागारका प्रमुख दलबहादुर बस्नेतले बताए ।
उनका अनुसार आन्दोलनका बेला क्षेत्रीय कारागारमा ५८५ जना कैदी रहेका थिए । भागेका कैदीमध्ये केहीलाई एक वर्षको अवधिमा पक्राउ गरिएको र बाँकीको खोजी भइरहेको उनले बताए ।
जेनजी आन्दोलनका क्रममा बाँकेसहित देशका विभिन्न स्थानमा रहेका बाल सुधार गृह तथा कारागारबाट ठूलो संख्यामा बालबन्दी र कैदी भागेका थिए । प्रहरीले फरार रहेकाहरूको खोजी तथा पक्राउ अभियान जारी राखेको जनाएको छ ।
Discussion about this post