बाँके, कात्तिक १६ गते ।
श्रीमतीसँगको सम्बन्ध बिग्रिएपछि बाँकेको खजुरा गाउँपालिका–६, उढरापुरका उस्मान खाँ न्यायको माग गर्दै सार्वजनिक रूपमा आएका छन्। उनले श्रीमतीको अर्का पुरुषसँग सम्बन्ध रहेको, आफूले वैदेशिक रोजगारीबाट कमाएको रकम हिनामिना भएको र श्रीमतीले छोराछोरीलाई समेत अलपत्र पारेको आरोप लगाएका छन्।
सोमबार नेपालगन्जमा पत्रकार सम्मेलन गर्दै उस्मानले आफूले भोगेको घटनाबारे जानकारी गराएका हुन्। उनले घटनाको निष्पक्ष छानबिन गरी न्याय दिलाउन प्रहरी, प्रशासन तथा सम्बन्धित निकायसँग माग गरेका छन्।
उस्मानका अनुसार उनी २०६५ सालदेखि रोजगारीका लागि कतार जाने–आउने गर्दै आएका थिए। विदेशमा रहँदा घरपरिवारको सम्पूर्ण जिम्मेवारी श्रीमती सबनम खाँलाई दिएका थिए। तर, २०८३ साल जेठको अन्त्यतिर श्रीमतीको खजुरा गाउँपालिका–६ कै ३० वर्षीय सद्दाम भनिने सम्सुदुहा खाँसँग सम्बन्ध रहेको र आफूले कमाएको रकमसमेत हिनामिना भएको जानकारी पाएपछि असार २ गते विदेशबाट फर्किएको उनले बताए।
घर फर्किएपछि श्रीमती र सम्सुदुहाबीचको सम्बन्धबारे थप जानकारी पाएको उस्मानको दाबी छ। उनका अनुसार सबनमले आफूलाई जबर्जस्ती करणी गरेको आरोप लगाउँदै सम्सुदुहाविरुद्ध प्रहरीमा उजुरी दिएकी छन्। सोही उजुरीका आधारमा सम्सुदुहा प्रहरी नियन्त्रणमा रहेको पनि उनले बताए।
श्रीमतीले लगाएको आरोपको समेत निष्पक्ष छानबिन हुनुपर्ने उस्मानको माग छ। उनका अनुसार भेरी अस्पतालमा गरिएको स्वास्थ्य परीक्षणका क्रममा सबनम एक महिनाको गर्भवती रहेको पाइएको थियो। यही घटनाक्रमलाई आधार बनाएर उनले श्रीमतीले आफूलाई निर्दोष देखाउन सम्सुदुहाविरुद्ध जबर्जस्ती करणीको आरोप लगाएको हुन सक्ने आशंका व्यक्त गरेका छन्।
उस्मानका अनुसार श्रीमती अहिले सम्पर्कविहीन छिन्। उनले १२ वर्षीया छोरी र आठ वर्षीय छोरालाई छाडेर गएको उस्मानको भनाइ छ। विदेशमा दुःख गरेर कमाएको रकमसमेत श्रीमती र सम्सुदुहाले हिनामिना गरेको उनको आरोप छ।
उस्मानले श्रीमतीसँग सम्बन्धविच्छेदको प्रक्रिया अघि बढाए पनि उनी सम्पर्कमा नआउँदा कानुनी प्रक्रिया अगाडि बढाउन समस्या भएको बताए। उनले सञ्चारमाध्यममार्फत श्रीमतीलाई सम्पर्कमा आउन आग्रह गर्दै विदेशमा कमाएको रकमको हिसाबकिताब सार्वजनिक गर्न माग गरेका छन्।
‘विदेशमा दुःख गरेर कमाएको पैसाले घरपरिवार चलाएँ। घरको जिम्मेवारी श्रीमतीलाई दिएको थिएँ। अहिले न पैसा छ, न श्रीमती साथमा छिन्। छोराछोरीको जिम्मेवारी पनि आफैँले सम्हाल्नुपरेको छ,’ उनले भने।
हाल नेपालमै बसेर ई–रिक्सा चलाउँदै आएका उस्मानले छोराछोरीको पालनपोषण गरिरहेका छन्। आफूले विदेशमा वर्षौं दुःख गरेर कमाएको रकम र पारिवारिक सम्बन्धसँग जोडिएको विवादको सत्यतथ्य बाहिर ल्याउन उनले सम्बन्धित निकायसँग निष्पक्ष छानबिनको माग गरेका छन्।
Discussion about this post