खोजखबर संवाददाता
काठमाडौँ असार २४ गते। सरकारका प्रवक्ता एवं सञ्चार तथा सूचना प्रविधिमन्त्री गोकुलप्रसाद बाँस्कोटाले सरकार कसैको पत्रले प्रभावित नहुने बताएका छन्।
मंगलबार बसेको मन्त्रिपरिषद्को बैठकपछि सिंहदरबारमा सञ्चारकर्मीसँग कुरा गर्दै उनले विषादी परीक्षण गर्ने सरकारको निर्णय फिर्ता लिने विषय कसैको पत्रका कारण नभएको प्रस्ट पारेका हुन्।
भारतबाट आयात हुने फलफूल र तरकारीमा असार २ गतेबाट सुरु गरिएको विषादी परीक्षण रोक्न भारतले दबाब दिएको पुष्टि भइसकेको छ। भारतीय राजदूतावासले मे २९ (असार १४ गते) मा परराष्ट्र मन्त्रालयमार्फत नेपाल सरकारलाई पत्र पठाउँदै विषादी परीक्षण गर्नुको कारण सोधेको खुलासा भएको छ (पढ्नुस् भारतको दबाबमा विषादी परीक्षण रोकिएको पुष्टि ) ।
भारतको पत्रपछि सरकारले आफ्नो निर्णय फिर्ता लिएको समाचार सार्वजनिक भइरहेको बेला प्रवक्ता बाँस्कोटाले त्यसलाई नकारेका हुन्। ‘हाम्रो व्यवस्थापनचाहिँ मूल कुरा हो। सरकारका आ आफ्नो चासोको बीचमा पत्र आउने जाने हुन सक्छन्। त्यसलाई हामीलाई अन्यथा लिनुहुँदैन्’ उनले भने।
परीक्षण गर्ने निर्णय फिर्ता लिए पनि प्रवक्ता बाँस्कोटाले आफूहरु देशको हितमा गम्भीरतापूर्वक लाग्ने बताए। ‘होहल्ला मच्चाउनुपर्दैन,’ उनले भने, ‘नागरिकको अधिकार र हाम्रो क्षमतालाई सँगै जोडेर लैजानुपर्छ।’
निर्णय गरिसकेपछि मात्रै क्षमता थाहा भएको कुरालाई उनले ‘इरर’ भएको बताए। त्यसलाई क्रमशः थप व्यवस्थापनतर्फ लैजाने उनले वाचा पनि गरे। उनले मंगलबारको बैठकमा आवश्यक सबै विषयमा छलफल भएको बताए। ‘कानुन, नियमावली, सरुवा बढुवा लगायतका सबै विषयमा कुरा भयो होला,’ उनले भने।
मन्त्रिपरिषद् हेरफेरको कुरा प्रधानमन्त्रीको नितान्त विशेषाधिकार भएको उनले दोहोर्याए।के आज प्रधानमन्त्रीले त्यो विशेषाधिकार प्रयोग गर्नुभयो त ? भन्ने प्रश्नमा प्रवक्ताले प्रतिप्रश्न गरे, ‘तपाईंहरु कुहिरीमण्डलमा हुनुहुन्छ र ? त्यस्तो विषयमा निर्णय नभएको उनले बताए।
-लाल्टिन खबरबाट
Discussion about this post