बाँके माघ १३ गते । नेपालगन्ज उद्योग वाणिज्य संघको अध्यक्षमा निर्वाचित भए पछि अब्दुल वाहिद मन्सुरी चुन्नाले सबै व्यवसायीलाई एक ढिक्का बनाएर लैजाने प्रतिवद्धता व्यक्त गरेका छन् ।
निर्वाचन लगत्तै मतदाता माझ उनले यस्तो बताएका हुन । चुनावी हारजितलाई बिर्सिएर बिशुद्ध व्यवसायीक हितमा काम गर्ने चुन्नाको भनाई छ ।
‘निर्वाचनमा हारजित स्वभाविक हो । निर्वाचनको तिता मिठा बिर्सिएर व्यवसायी साथीहरुलाई एक ढिक्का बनाएर अगाडी बढ्ने छु ।’ चुन्नाले भने–‘संघलाई बलियो बनाउँदै व्यवसायीक हित हाम्रो मुख्य लक्ष्य हो ।’
बुवाको पद्चाप पछ्याउँदै चुन्ना नेपालगन्जमा बिस वर्षदेखि व्यवसायीक क्षेत्रमा सक्रिय छन् । अजिज किराना स्टोरका प्रोपराईटर चुन्ना व्यवसायीक संगसंगै सामाजिक क्षेत्रमा समेत क्रियाशिल रहँदै आएका छन् । नेपालगन्ज उद्योग वाणिज्य संघमा २ कार्यकाल कार्यसमिति सदस्य, एक कार्यकाल उपाध्यक्ष र अहिले बरिष्ठ उपाध्यक्ष रहेका चुन्ना नेपालगन्ज किराना तथा खाद्यन व्यवसायी संघको २०६३ सालदेखि हालसम्म नेतृत्वदायी भूमिकामा छन् ।
त्यस्तै नेपाल बितरक महासंघमा पूर्व कार्यसमिति सदस्य, नेपालगन्ज बितरक संघमा सदस्य हुनुहुन्छ भने लायन्स क्लव सिद्धी बिनायकको पूर्व अध्यक्ष समेत भई बिभिन्न अनुभव सङ्गालेका प्रतिष्ठित, उर्जावान , जुझारु युवा व्यवसायी हुनुहुन्छ । बिशुद्ध व्यवसायीक क्षेत्रबाट उदय भएका सफल व्यवसायी चुन्नाले जुन क्षेत्रमा नेतृत्वदायी भूमिका खेल्दै ती संघ संस्थाहरु आज व्यवसायी माझ परिचित छन् ।
नेपालगन्जको उद्योग व्यवसाय अहिले धरमरको अवस्थामा छ । अर्कोतर्फ सरकारले ल्याएका नयाँ नयाँ कर प्रणालीहरु अव्यवहारिक र झञ्झटिलो बन्दा उद्योगी, व्यवसायी मर्कामा परेका छन् । यस्तो परिस्थितीमा सिङ्गो बाँके र यहाँका उद्योगी, व्यवसायीको हितमा काम गर्ने अवसर र चुनौती चुन्नाको काँधमा आएको छ ।
Discussion about this post