बाँके माघ १७ गते । बाँकेका वरिष्ठ पत्रकार एवं प्रेस स्वतन्त्रता सेनानी पन्नालाल गुप्त ‘चाचा’जी को अन्त्येष्टि गरिएको छ । ‘चाचा’जी को गत बुधबार राती निधन भएको थियो उहाँको शुक्रबार बाँकेको राप्तीनदीको सिधनिया घाटमा अन्तिम संस्कार गरिएको हो । उहाँको पार्थिव शरिरलाई जेष्ठ सुपुत्र विजय गुप्ताले दागबत्ति दिनुभएको थियो ।
त्यसअघि चाचाजीको पार्थिक शरीरलाई अन्तिम श्रद्धाञ्जलीका लागि नेपालगञ्जको रानी तलाउस्थित उहाँको पुरानो घरमा राखिएको थियो । श्रद्धाञ्जलीपछि चाचाजीको पार्थिव शरीरलाई नगरपरिक्रमा गराई सिधनिया घाटमा हिन्दु परम्पराअनुसार दाहसंस्कार गरिएको हो ।
श्रद्धाञ्जली कार्यक्रममा बोल्दै नेपाल पत्रकार महासंघका महासचिव रमेश विष्टले सादगी, शालिन र आफ्नो कर्ममा दृढ ब्यक्तित्वका रुपमा पन्नालाल गुप्तको पहिचान स्थापित भएको उल्लेख गर्नु भयो । गुप्तको निधनले पत्रकारिता क्षेत्रमा अपुरणिय क्षती पुगेको भन्दै विष्टले सम्पूर्ण पत्रकारहरुले चाचा जी को सिद्धान्तलाई अंगिकार गर्न सक्नुपर्ने बताउनु भयो ।
कार्यक्रममा जिल्लाका सबै पत्रकार, राजनीतिक दलका प्रतिनिधि, ब्यापारी ब्यवसायीलगायतले चाचाप्रति श्रद्धाञ्जली अर्पण गरेका थिए । चाचाको बुधवार बेलुका नेपालगञ्ज मेडिकल कलेज शिक्षण अस्पताल नेपालगञ्जमा उपचारका क्रममा निधन भएको हो । परिवारका अनुसार गुप्ता अचेत भएपछि अस्पताल पुर्याएलगत्तै डाक्टरले मृत घोषणा गरेका थिए ।
चाचाजीका श्रीमती, चार छोरा र एक छोरी छन् । वि.सं. १९८५ सालमा जन्मनु भएका चाचाजी नेपाल पत्रकार महासंघ बाँकेको पूर्व अध्यक्ष, प्रेस युनियन बाँकेको संस्थापक अध्यक्ष रहदै नेतृत्व दिनु भएका चाचाजी स्थानीय ‘किरण साप्ताहिक’ पत्रिकाको सम्पादकका रुपमा कार्यरत रहनु भएको थियो ।
Discussion about this post