खोजखबर संवाददाता
बाँके असार २९ गते।नेपालगन्जमा आइतवारदेखि राष्ट्रपति खेलकुद महिला सहभागिता कार्यक्रम अन्तरगत अभिवृद्धि तालिम सुरु भएको छ । राष्ट्रिय खेलकुद परिषदको आयोजना, जिल्ला खेलकुद विकास समितिको संयोजन र व्यवस्थापनमा सुरु भएको तालिम उद्घाटन कार्यक्रममा बोल्दै प्रमुख अतिथि समेत रहेका जिल्ला समन्वय समिति बाँकेका संयोजक अजय श्रीवास्तवले महिला खेलाडी उत्पादन गर्नका लागि तालिम उपयोगि बन्ने बताए ।
महिला सशक्तिकरणका लागि हाम्रो संकल्प, खेलकुदमा महिला सहभागीता उत्तम विकल्प भन्ने मुख्य नाराका साथ महिला हिंसा न्युनिकरण, क्षमता अभिबृद्धी र किशोरीहरुको आत्मरक्षाका लागि तालिम संचालन गरिएको हो । जिल्ला खेलकुद विकास समितिका अध्यक्ष आतंक बस्नेतको सभापतित्वमा भएको कार्यक्रममा बोल्दै मध्यपश्चिम क्षेत्रीय खेलकुद विकास समिति नेपालगन्जका कार्यवाहक अध्यक्ष नरेन्द्र थापाले यो तालिमले छात्राहरुमा प्रतिरक्षा गर्ने क्षमताको विकास हुने बताए ।
उनले तालिमले महिलामाथि हुने हिंसाको न्युनीकरणमा सहयोग पुर्याउनुका साथै उनीहरुलाई खेलक्षेत्रमा समेत प्रेरित गर्ने बताए ।
सोमवारसम्म चल्ने तालिममा १ सय ५० जना छात्राको सहभागीता रहेको छ । संजु मर्हजन र राधिका हमाल प्रशिक्षक रहेको सो तालिम उद्घाटनसत्रको स्वागत मन्तव्य बाँके जिल्ला खेलकुद विकास समितिका कोषाध्यक्ष नारायणी ओलीले राखेकी थिइन् भने कार्यक्रम सन्तोष श्रेष्ठले सन्चालन गरेका थिए ।
Discussion about this post