बाँके, असोज ६ गते ।
बाँकेका विभिन्न अस्पतालमा रगतको माग बढ्दै गए पनि संकलन घटेपछि नेपालगन्जमा रक्तदान कार्यक्रम गरिएको छ । कार्यक्रममा ६३ पिन्ट रगत संकलन भएको छ ।
प्रादेशिक रक्त सञ्चार केन्द्र नेपालगन्जका प्रमुख उपेन्द्र रेग्मीले पछिल्लो समय रगत संकलन घट्दै गएपछि केन्द्रमा रगतको अभाव देखिन थालेको बताए । उनले रगतको मागअनुसार संकलन हुन नसक्दा अभावको अवस्था थप गम्भीर बन्दै गएको बताए ।
‘केही दिनयता रगत संकलन गर्ने क्रम घटेको छ,’ उनले भने, ‘रगतको माग पहिलेदेखि नै संकलनभन्दा बढी हुँदै आएको छ । त्यसैले अहिले अभाव झन् बढ्दै गएको हो ।’
उनले अन्य संघसंस्था तथा नियमित रक्तदातालाई पनि रक्तदान कार्यक्रम आयोजना गर्न आग्रह गरे । अस्पतालमा उपचाररत बिरामीका लागि आवश्यक रगतको आपूर्ति सहज बनाउन नियमित रक्तदान आवश्यक रहेको उनले बताए ।
जनमत अर्धसाप्ताहिकले गोपाल–नीना फाउण्डेशन नेपालको समन्वयमा रक्तदान कार्यक्रम आयोजना गरेको हो । जनमत अर्धसाप्ताहिकका सम्पादक पूर्णलाल चूकेले २०६३ सालदेखि त्रैमासिक रूपमा निरन्तर रक्तदान कार्यक्रम गर्दै आएको बताए ।
उनका अनुसार यो जनमत अर्धसाप्ताहिकको ७१औँ रक्तदान कार्यक्रम हो । पछिल्लो समय बाँकेका विभिन्न अस्पतालमा रगतको माग बढे पनि प्रादेशिक रक्त सञ्चार केन्द्रमा आवश्यक मात्रामा रगत नभएकाले कार्यक्रम आयोजना गरिएको उनले बताए ।
‘अस्पतालमा रगतको माग बढिरहेको छ, तर रक्त सञ्चार केन्द्रमा पर्याप्त रगत छैन,’ चूकेले भने, ‘त्यसैले नियमित रूपमा गर्दै आएको रक्तदान कार्यक्रमलाई निरन्तरता दिएका हौँ ।’
कार्यक्रममा चिकित्सक, स्वास्थ्यकर्मी, पत्रकार, औषधि व्यवसायी तथा नियमित रक्तदातासहित ६३ जनाले रक्तदान गरेको उनले बताए ।
कार्यक्रममा लामो समयदेखि नियमित रक्तदान गर्दै आएका तथा रक्तदान अभियानमा योगदान पु¥याउँदै आएका पाँच जना रक्त अभियन्तालाई सम्मान गरिएको आयोजकले जनाएको छ ।
सम्मानित हुनेमा दैनिक नेपालगन्जका सम्पादक झलक गैरे, मेरोखुशी डटकमका सम्पादक शंकरप्रसाद खनाल, राप्ती सोनारी गाउँपालिका–६ का वडाध्यक्ष तथा नेपाल स्वयंसेवी रक्तदाता समाज बाँके, राप्ती सोनारी उपशाखाका सल्लाहकार लवराज खरेल, महिला रक्तदाता तथा नेपाल स्वयंसेवी रक्तदाता समाज बाँके, राप्ती सोनारी उपशाखाकी उपाध्यक्ष अमृता केसी र नेपाल स्वयंसेवी रक्तदाता समाज बर्दियाका अध्यक्ष प्रेमप्रसाद लम्साल रहेका छन् ।
लम्सालले हालसम्म ७९ पटक रक्तदान गरिसकेको आयोजकले जनाएको छ ।
Discussion about this post