जावेद अन्सारी बाँके चैत १६ गते । तपाई खाद्यान्न किन्न घरबाट निस्कदै हुनुहुन्छ ? वा तपाई तरकारी किन्न जाने तम्तयारी गर्दै हुनुहुन्छ ? यदी त्यसो हो भने एक्लै जानुहोस् । आफन्त र छरछिमेकीलाई संगसाथी बनाएर जाने तयारी गर्नु भयो भने प्रहरीले तपाईलाई बीच बाटोबाटै फकाईदिन सक्छ । अत्यावश्यक खाद्यान्न, तरकारीलगायतका सामाग्रीका पसल नेपालगन्जमा विहानदेखि साँझैसम्म खुल्ने गरेका छन् । तर मानिसहरु साँझ ५ बजेपछि मात्र यि सामाग्री किन्न पसलमा जाने गरेका कारण भीडभाड बढ्ता हुने गरेको छ । भीडभाडलाई रोक्न प्रहरीले आवश्यक सामाग्री पाइने पसल दिनभरी खुल्ने भएकाले उक्त समयमा गएर खरिद गर्न आग्रह गरेको छ । बाँकेका एसपी बीरबहादुर ओलीले भन्नुभयो, ‘साँझ पाँच बजेपछि मात्रै पसल खुल्छ र किनमेल गर्न पाइन्छ भन्ने मनोविज्ञान हट्न जरुरी छ, तपाई दिउँसोको समयमा एक्लै गएर सामाग्री किनेर लैजान प्रहरीले रोक्दैन्, तर साथीसंंगी जम्मा गरेर पसल जाने, भिडभाड गर्न पाइदैन् ।’
नागरिकहरुलाई दैनिक उपभोग्य सामाग्री अभाव नहोस् भन्ने हेतुले बाँके प्रहरी प्रशासनले सकेसम्म व्यवस्थित गराउने प्रयास गरिरहेको छ । तर राजनीतिक दलले गरेको बन्द जस्तो मानिसहरु भने साँझ ५ बजेपछि सडकमा निस्कने गरेका छन् । देश कोरोना जस्तो महामारीको उच्च जोखिममा रहेकाले सरकारले कोरोना फैलिन नदिन लकडाउन गरेको अवस्थामा प्रत्येक नागरिकले आफ्नो दायित्व पूरा गर्नुपर्ने बाँकेका सिडिओ कुमारबहादुर खड्काले बताउनुभयो । ‘यो बिषम परिस्थिति हो, सरकारले आफ्ना जनताको सुरक्षाका लागि गरेको निर्णयलाई सबैले पालना गर्नु पर्छ’ सिडिओ खड्काको भनाइ छ ।
Discussion about this post