बर्दिया चैत्र १९ गते । विश्वभर महामारीको रुपमा फैलिरहेको कोरोना भाइरसको जोखिमबाट जोगिन बर्दियामा औषधी छर्कन थालिएको छ । मंगलबारदेखि जिल्लाको ठाकुरबाबा नगरपालिकामा औषधी छर्कने काम सुरु भएको छ । यसअघि बर्दियाका गुलरिया, राजापुर लगाएतका नगरपालिकाहरुमा उक्त औषधी छर्किसकिएको छ ।
निमार्ण व्यवसायी संघ बर्दिया आर्थिक तथा प्राविधिक सहयोग, निमार्ण व्यवसायी संघ उपसमिति ठाकुरबाबा र ठाकुरबाबा नगरपालिकाको समन्वयमा नगर क्षेत्रमा औषधी छर्कन लागिएको हो । नगरका मुख्य बजार क्षेत्र भुरिगाउँ, बग्नाहा, शाहीपुर, शिवपुर र ठाकुरद्धारामा औषधी छर्कने बताइएको छ । यसैगरि गाउँका मुख्य–मुख्य चोक, मुख्य सडक, विद्यालय र क्वारेन्टाइन स्थापना गरिएको क्षेत्र औषधी छर्कने निमार्ण व्यवसायी संघ बर्दियाका उपाध्यक्ष विजय शाहले जानकारी दिनुभयो ।
निमार्ण व्यवसायी संघमा आवद्ध व्यक्तिहरुबाट संकलन भएको रकमबाट नगरमा औषधी छर्कन लागिएको उपाध्यक्ष शाहले बताउनुभयो । पानीमा फर्मालिन, ब्लिचिङ्ग पाउडर र पोटासियम परमेगनेट मिसाएर औषधी तयार पारिएको छ । ट्याङकरको सहायताले औषधी छर्कने काम भइरहेको छ । यो औषधीले एन्टीसेफ्टिकको काम गर्ने प्राविधिकले बताएका छन् ।
निमार्ण व्यवसायी संघले यस अघि सदरमुकाम गुलरिया नगरपालिकामा औषधी छर्केको थियो भने राजापुर नगरपालिकामा समेत औषधी छर्किएको थियो । ठाकुरबाबा नगरपालिकामा औषधी छर्ने काम सकिएलगत्तै मधुवन, बारबर्दिया, बासगढीलगाएतका पालिकामा पनि औषधी छर्कने बताइएको छ । औषधी छर्कने काममा सहयोग गर्न निमार्ण व्यवसायीहरुले जनशक्ति परिचालन गरेको निमार्ण व्यवसायी संघ ठाकुरबाबा उपशाखाका संयोजक प्रेमराज ढुंगानाले बताउनुभयो । विषाधी छर्किएको भन्ने गलत हल्ला फैलिएकाले नआत्तीन समेत स्थानियलाई आग्रह गरिएको छ ।औषधी छर्केर नगरबासीलाई सुरक्षित राख्ने प्रयास गरिएको ठाकुरबाबा नगरपालिकाका नगरप्रमुख घननारायण श्रेष्ठले बताउनुभयो । नगरमा औषधी छर्किए पनि यस्तो संक्रमणको बेलामा नगरबासीहरु घरमै बसेर सुरक्षित रहन नगरप्रमुख श्रेष्ठले आग्रह गर्नुभएको छ । बर्दियामा पुनः एक साता निषेधाज्ञा जारी गरिएसंगै बर्दिया जिल्ला सुनसान बनेको छ ।
Discussion about this post