सुर्खेत बैशाख २ गते । नेपाल कम्युनिष्ट पार्टी नेकपाको चौकुने गाउँ कमीटिको ‘भर्चुअल’ बैठक बसेको छ । मंगलबार सामाजिक सञ्जाल फेसबुक मेसेन्जरमार्फत भएको बैठकमा कोरोना महामारीका कारण समस्यामा परेका विपन्न वर्गलाई राहत दिनेबारे छलफल भएको छ ।
अध्यक्ष गंगाराम विकको अध्यक्षतामा बसेको भर्चुअल बैठकले कोरोना भाइरसविरुद्ध अभियान सञ्चालन गर्ने, एकदेखि १० वटै वडाका पदाधिकारी तथा सदस्यहरुलाई परिचालन गर्ने, कैलालीसँगका बन्द सीमानाकामा सुरक्षाका लागि थप सुरक्षाकर्मीका लागि पहल गर्ने भएको छ ।
यस्तै अन्य बिरामीका लागि स्वास्थ्य चौकीमा औषधी पर्याप्त नभएकोले थप औषधिका लागि पालिकासँग पहल गर्ने, चौकुनेमा अति विपन्न घरपरिवारको तथ्यांक तयार गरेर राहतका लागि पनि पहल गरिने भएको छ । यस्तै प्रत्येक वडामा स्थानीय स्वंयमसेवकमार्फत कोरना भाईरसविरुद्ध जनचेतना अभियान चलाउने, पालिका सरकारलाई सहयोग गर्ने र थप सबैसँग सल्लाह गर्नेबारे छलफल भएको अध्यक्ष विकले जानकारी दिए ।
गाउँ कमीटिका सचिव हरि अधिकारीले संयोजन गरेको भर्चुअल बैठकमा नेकपाको जिल्ला कमीटि सदस्य मोहन बडुवाल, चौकुने गाउँपालिकाका उपाध्यक्ष निर्मला राना मगर, वडाध्यक्ष नवराज आचार्य, इन्द्र ढकाल, शंकर टमट्टा लगायत सहभागि थिए ।
Discussion about this post