काठमाडौ बैशाख १९ गते । नेताहरुलाई रनभुल्लमा पार्न प्रधानमन्त्री केपी शर्मा ओलीले नेकपाका उपाध्यक्ष बामदेव गौतमलाई प्रधानमन्त्री बनाउने सरप्राइज प्रस्ताव गरेका छन ।
बुधबार बसेको नेकपा सचिवालय बैठकमा अरु नेताहरुलाई अचम्म बनाउदै बामदेवलाई प्रधानमन्त्री बनाउने ओलीले प्रस्ताव गरेका हुन । जबकी बामदेव प्रधानमन्त्री बन्न अहिलेसम्म योग्य छैनन् ।
सांसद नै नभएका बामदेवलाई तत्कालका लागि प्रधानमन्त्री बन्ने बाटो खुल्ला छैन । सचिवालयको निर्णयअनुसार उनी यसका लागि राष्ट्रियसभा सांसद बनेर मात्रै पुग्दैन । संविधान नै संशोधन गर्नुपर्छ ।
नेपालको संविधान २०७२ मा प्रधानमन्त्री बन्नका लागि जनताबाट प्रत्यक्ष निर्वाचित हुनुपर्ने व्यवस्था छ । अर्थात जनताले छानेको मान्छेले मात्रै कार्यकारी पद पाउँछ । राष्ट्रियसभा सांसद सोझै प्रधानमन्त्री बन्न पाउदैन । यसर्थ बामदेव गौतम तत्कालका लागि प्रधानमन्त्री बन्न अयोग्य रहेको संविधानविद भीमार्जुन आचार्य बताउँछन ।
‘अहिलेको परिस्थितीमा बामदेव गौतमलाई प्रधानमन्त्री बनाउछु भन्नु हास्यास्पद कुरा हो । राजनीतिक खिचातानीका लागि एउटा हारेको व्यक्तिलाई प्रधानमन्त्री बनाउनु र जितेको व्यक्तिलाई कार्यकारी बन्नै नदिनु फोहोरी खेल बाहेक केही हुनै सक्दैन’ आचार्य भन्छन ।
ओलीले एकलौटी तर मनलाग्दी रुपमा पार्टी र सरकार चलाएपछि नेकपामा असन्तुष्टि चर्को छ । उनी अहिले नेकपाको प्रधानमन्त्री भन्दा पनि ओली गुटका कार्यकारी मात्रै बनेका छन । प्रधानमन्त्री बनेको दुई बर्षमा नेपाली नागरिकले ओली सरकारबाट खास राहत पाउन सकेका छैनन् ।
झन दल फुटाउने अध्यादेश ल्याएपछि त ओलीलाई प्रधानमन्त्री र पार्टी अध्यक्षबाट हटाउनुपर्ने आवाज नेकपाभित्रैबाट चर्कोसँग उठेको छ । यसैको मौका छोपेर प्रचण्ड, माधव नेपाल, झलनाथ खनाल, बामदेव गौतम र नारायणकाजी श्रेष्ठ ओलीलाई पदच्युत गर्न लागिपरेका छन ।
जुन पछिल्लो एक हप्तायता चर्चासँगै भित्री र बाहिर चलखेल पनि राम्रै चलिरहेको छ । तर राजनीतिमा पाका र परिपक्व खेलाडी मानिने ओलीले सजिलै अध्यक्ष र प्रधानमन्त्री पद छाड्नेवाला छैनन ।तत्काल प्रधानमन्त्री बनाउन सम्भव नभएपनि बामदेव नै कोरोनापछिको प्रधानमन्त्री भन्न थालेका छन ।
उनको प्रस्तावलाई महासचिव विष्णु पौडेल, गृहमन्त्री रामबहादु थापा, उपप्रधान तथा रक्षामन्त्री इश्वर पोखरेलले आँखा चिम्लेर समर्थन गरिरहेका छन । तर प्रचण्ड, झलनाथ, माधव नेपाल र नारायणकाजी ओलीको यो प्रस्तावलाई हावादारी भन्छन ।
पार्टीको सचिवालय बैठकले राष्ट्रियसभा सांसद बनाउने निर्णय गरिसक्दा त्यसलाई कार्यान्वयन नगर्ने ओलीले बामदेवलाई प्रधानमन्त्री बनाएर निकास दिन्छन भन्नु हावाहारी हो ।
हुन पनि ओलीले आफ्नै अध्यक्षतामा बसेको सचिवालय बैठकले गरेको बामदेवलाई राष्ट्रियसभा सांसद बनाउने निर्णय अहिलेसम्म कार्यान्वयन गरेका छैनन् । उनको त्यो कार्यशैलीबाट बामदेव प्रधानमन्त्री बन्छन भन्नु हास्यास्पद हुन्छ ।
तर अहिले ओलीको स्वार्थ फेरिएको छ । विगतमा आफ्नो गुट भए सबथोक पुगिसक्यो भन्ने ओली अहिले यता न उताको अवस्था छन । न उनी पार्टीभित्र शक्तिशाली छन । न त सरकारमा नै जिम्मेवार प्रधानमन्त्री बन्न सकेका छन ।
उनको आफ्नै खराब बोली र व्यवहारले पदच्युत हुनपर्ने अवस्थामा पुगेका छन । यस्तो बेला सहयोग माग्दा आफ्नै पार्टीका माधव नेपाल, झलनाथ खनाल, बामदेव गौतम प्रमुख प्रतिपक्षी बने । साथ सहयोग माग्दा पनि नदिएपछि ओलीले प्रचण्ड गुटलाई कमजोर पार्न बामदेवलाई प्रधानमन्त्री बनाउन चाहेका हुन ।
बामदेवलाई प्रधानमन्त्री बनाउन राष्ट्रियसभामा उम्मेदवार बनाउनुपर्छ । सचिवालय निर्णय कार्यान्वयन भएपछि राष्ट्रपतिले सांसदमा मनोनित गर्नुपर्छ । सांसद बनाएपछि संविधान संशोधन गर्नुपर्ने, संविधान संशोधन गर्न दुई तिहाई नपुग्ने, तत्कालै मधेसकेन्द्रित दल सरकारमा नआउने भएकाले ओलीलाई प्रचण्ड गुट फुटाउन बामदेव कार्ड प्रयोग गर्न सजिलो भएको हो । यदि बामदेवले प्रधानमन्त्री बन्छु भन्दा पनि ओलीले चाहेर मात्रै त्यो सम्भव छैन ।
यसका लागि माधव नेपाल, झलनाथ र प्रचण्ड कन्भिन्स हुनुपर्छ । अन्यथा त्यो ओलीको रणनीतिक चाल मात्रै हो । जुन पुरा हुन झनै सम्भव देखिदैन । यस्तो अवस्थामा बामदेवलाइ प्रधानमन्त्री बनाउँछु भनेर बाँकी दुई बर्ष पनि आफै प्रधानमन्त्री बन्ने ओलीको स्पष्ट स्वार्थ हो । ओलीको यो स्वार्थमा गोटी बने बामदेव त फस्छन नै नेपाली जनताका लागि पनि ओली सरकार, नेकपा र कम्युनिष्ट पार्टीबाट धोका हो ।
Discussion about this post