खोजखबर संवाददाता
बाँके साउन २६ गते । आफ्नो चाड बक्राईद मनाउन नेपालगन्ज आउनु भएका सहरी विकास मन्त्री मो. ईस्तियाक राई अहिले वडाबासीहरुको समस्या सुन्नमा ब्यस्त हुनु भएको छ ।
नेपालगन्ज उपमहानगरपालिका वडा नं. २ र ४ को वडाबासीहरुको गुनासो सुन्न सहरी विकास मन्त्री राई स्थानिय गुम्बामा गई गुनासो सुन्नुको साथै विकास सम्बन्धी आश्वासन दिंदै छिट्टै नै पुरा गर्ने बचन दिनु भएको छ ।
स्थानिय वडाबासीहरुले विकास सम्बन्धी तथा विद्यालयमा परेका समस्याको बारेमा आ–आफ्ना गुनासो राख्नुको साथै बाँके जिल्लाबाट प्रतिनिधित्व गरेका सहरी विकास मन्त्री राईलाई विकासमा जोड दिँदै समस्या समाधानको लागि अनुरोध गरेका थिए ।
वडाबासीहरुको गुनासो सुन्नुको साथै सहरी विकास मन्त्री राईले नेपालगन्ज उपमहागरपालिकाको लागि ७ करोडको बजेट दिएकोमा सबैभन्दा बढी योजना वडा नं. २ मा राखेको भन्दै भन्नुभयो–‘वडाबासीहरुसँग प्रत्यक्ष कुरा गर्न पाउँदा खुशी छु । म केन्द्रिय स्तरको मन्त्री भएतापनि बाँके जिल्लाको चौकिदारको हैसियतले कार्य गरी रहेको छु । ७७ वटा जिल्लामा नेपालगन्जलाई नमुनाको सहर बनाउनको लागि म लागी परेको छु । भर्खर मात्र नगरको सौन्दर्यकरणको लागि आजबाट नै १० हजार बिरुवा रोप्ने कार्यको शुरुवात गरेको छु । मलाई अर्को निर्वाचनमा तपाईहरुमाझ वोट माग्न आउनु पर्छ । जसले काम गर्छ, उसलाई यहाँका जनताले साथ दिने छन् भन्ने मैले विश्वास लिएको छु ।’
सहरी विकास मन्त्री राईद्वारा विकासको लागि गरिएको प्रतिबद्धताबाट वडाबासीको भेलामा वडाबासीहरु समेतले खुशी व्यक्त गर्नुका साथ टोल–टोलमा विकास हुने कुरामा ढुक्क समेत भएको बताएका छन् ।
धर्मको नाममा राजनीतिलाई समाप्त पार्ने सहरी विकास मन्त्री राईको धारणा अन्तरगत सहरी विकास मन्त्री राईले अगाडि थप्नुभयो–‘बाँके जिल्लामा धर्मको राजनीतिलाई समाप्त पार्छु । मैले सबैतर्फ मन्दिर, मस्जिद र गुरुद्वाराको विकासको लागि सहयोग गरेको छु । तर चर्च र गुम्बाको विकासको लागि छुट हुन गएको मलाई महसुस भएको छ । कुनै पनि धर्मलाई म सम्मान गर्नुको साथै सबैतर्फ मन्दिर, मस्जिद, गुरुद्वारा, चर्च र गुम्बाको लागि मेरो मन्त्रालयबाट होस् वा सांसद विकास कोषबाट सहयोग गर्नेछु । वडा नं. २ र ४ को विकासको लागि पनि मन्त्रालयबाट होस् वा सांसद विकास कोषबाट नै किन नहोस्, विकास गर्छु र हुन्छ पनि ।’
वडाबासीहरुको गुनासो र मन्त्री राईको प्रतिबद्धतापछि मन्त्री राईले वडा नं. २ को वडाबासीहरुको अनुरोधमा वडा निरिक्षण समेत गर्नु भएको छ ।
Discussion about this post