खोजखबर संवाददाता
ब्यापारिक भवन बनाउने निर्णयको चौतर्फी विरोध
बाँके साउन ३० गते । पश्चिम नेपालकै सबैभन्दा ठुलो धार्मिक पिठ नेपालगञ्जस्थित बागेश्वरी मन्दिरलाई फराकिलो, सुन्दर र भव्य बनाउनु पर्ने स्थानीयको माग छ ।
मन्दिरको प्रांगणमा व्यापारिक भवन बनाउन लागिएकोमा सो को उनिहरुले चर्को विरोध गरेका छन् । तत्काल सो निर्माण रोक्न दवाव समेत उनिहरुले दिएका छन् ।
मन्दिरलाई फराकिलो पारेर खुल्ला राख्नु पर्ने तथा मन्दिरको सौन्दर्यकरणमा ध्यान दिनु पर्ने ठाउमा चारैतिर व्यापारिक भवन बनाएर झन मन्दिरलाई छेक्नुका साथै साँगुरो बनाउन लागिएकोमा सो कार्य तत्काल रोक्नु पर्ने नेपाल उद्योग बाणिज्य महासंघका केन्द्रिय सदस्य कृष्ण प्रसाद श्रेष्ठले बताए ।
यस्तै नेपालगञ्जका सामाजिक अभियन्ता विभेक श्रेष्ठले बागेश्वरी मन्दिर कुनै व्यवसाय गर्ने थलो नभएको जनाउँदै मन्दिरलाई फराकिलो, सुन्दर र आकर्षक बनाउनु पर्नेमा जोड दिए ।
उनले मन्दिर छेक्ने गरी कुनै पनि व्यवसायीक भवन बन्न नदिने बताएका छन् ।
यस्तै अर्का अगुवा दिवाकर खनालले मन्दिरको अगाडी व्यवसायीक भवनको कुनै पनि आवश्यकता नरहेकोले सो निर्माण तत्काल रोक्न माग गरे । नरोकिए त्यसको कडा प्रतिवाद गर्ने समेत उनले चेतावनी दिए ।
सो बारेमा सहरी विकास मन्त्री मोहम्मद ईश्तियाक राईसंग प्रतिक्रिया माग्दा उनले सरकारले सहरलाई व्यवस्थित बनाउनुका साथै धार्मिक स्थलहरुलाई समेत सुन्दर र फराकिलो पार्ने योजना बनाएको बताउनु भयो । उहाँले मन्दिरलाई छेक्ने गरी कुनै पनि भवन बनाउन नपाइने बताउनु भयो ।
मन्दिरको प्रांगणमा दुई तले सपिङ्ग कम्पलेक्स बनाउन लागिएको मन्दिर व्यवसथापन समितिले जनाएको छ । पहिलो तल्लामा १७ वटा सटर निर्माण हुनेछन् । प्रदेश सरकार र विभिन्न धर्मावलम्बीहरुको सहयोगमा माथिल्लो तल्लामा साधु सन्तका लागि धर्मशाला निर्माण गर्ने योजना रहेको छ ।
९३ लाख रुपियाको लागतमा सो भवन निर्माण कार्य सुरु भएको जनाईएको छ
Discussion about this post