खोजखबर संवाददाता
बाँके भदौ १४ गते । नेपाल सरकारका सहरी विकास मन्त्री मोहम्मद ईश्तियाक राईले महिलाहरुको महानपर्व तिजलाई कला र संस्कृति संरक्षण गर्ने पर्वका रुपमा मनाउनु पर्ने बताउनु भएको छ ।
उहाँले यो महान पर्वले महिलाहरुलाई शसक्त र सक्षम बनाउन मद्दत गर्ने जनाउँदै यसलाई आधुनिक नभई परम्परागत तरिकाले मनाउनु पर्नेमा जोड दिनु भयो ।
तीजको अवसर पारेर समाजवादी महिला संघ जिल्ला कमिटि बाँकेको आयोजना र समाजवादी पार्टी बाँकेको सहकार्यमा शनिवार नेपालगन्जमा आयोजना गरिएको शुभकामना आदान प्रदान कार्यक्रमलाई सम्बोधन गर्दै मन्त्री राईले नेपालगन्जका गाईहरुलाई सुर्खेतमा लगेर मारिएको घट्नाले निकै दुखी बनाएको बताउनु भयो ।
उहाँले सो घट्नाको छानविन शुरु भैसकेकोले घट्नामा संलग्नहरुबारे छिटै जानकारी हुने र दोषीलाई सजाय मिल्ने निश्चित रहेको बताउनु भयो ।
शनिवार विहान आफ्नो गृहनगर नेपालगञ्ज आउनु भएका मन्त्री राईले उहाँले छाडा पशु सरंक्षणका लागि नेपालगञ्जको कान्जीहाउस अप्रयाप्त र राम्रो ठाउँमा नरहेको जनाउँदै जंगलको छेउमा कतै त्यसका लागि व्यवस्था गरिनु पर्ने आवश्यकता औल्याउनु भयो ।
उहाँले आफ्ना कार्यकर्तालाई संयम अपनाउन निर्देशन दिंदै सबैले मिलेर यो समस्याको समाधान निकाल्नु पर्नेमा पनि जोड दिनुभयो । सर्वदलीय सहमतिबाट मात्रै यसको निकास संभव रहेको उहाँले जनाउनु भयो ।
सो अवसरमा समाजवादी पार्टीका केन्द्रिय सदस्य अजय श्रीवास्सतव, समाजवादी पार्टी बाँकेका अध्यक्ष कमरुद्दीन राई, समाजवादी पार्टी महिला संघ अध्यक्ष उषा गौतम, समाजवादी पार्टी प्रदेश कोषाध्यक्ष अम्बिका काफ्ले, महिलला सेल नेपालगन्जका प्रमुख लक्ष्मी श्रेष्ठ लगायतले पनि तीजको शुभकामना दिनु भएको थियो ।
सो अवसरमा सहभागि महिलाहरुले नाचगान समेत गरेका थिए ।
Discussion about this post