काठमाडौं भदौ २६ गते ।
सत्तारुढ नेपाल कम्युनिष्ट पार्टी नेकपाको जारी स्थायी कमिटीको बैठकमा वरिष्ठ नेता माधवकुमार नेपालले विधि र पद्धतिको प्रश्न उठाएका छन्। प्रधानमन्त्री केपी शर्मा ओली र अध्यक्ष पुष्पकमल दाहाल प्रचण्डले ल्याएको सहमतिको प्रस्तावमा आफ्नो मुख्य एजेण्डा समावेश नभएपछि नेता नेपालले असन्तुष्टि जनाएका हुन्। ‘पार्टीलाई विधि र पद्धतिमा चलाउनका लागि मैले एक व्यक्ति एक पदको कुरा उठाएको थिएँ।
तर, सहमतिको प्रस्तावमा त्यो कुरा किन समावेश हुन सकेन भन्दै उनले बैठकमा प्रश्न गरेका थिए उनको भनाईलाई उद्धृत गर्दै एक स्थायी कमिटी सदस्यले भने, ‘पार्टीलाई विधि र पद्धतिमा चलाउनका लागि यस्तो बहस गरियो। अहिले आएर त्यसलाई किन छाडियो?’नेता नेपालले गत बिहीबार बसेको सचिवालय बैठकमा पनि प्रतिवेदनमाथि आफ्नो १५ बुँदे असन्तुष्टि जनाएका थिए। महासचिव विष्णु पौडेल नेतृत्वको कार्यदलको प्रतिवेदनमा नेता नेपालले असन्तुष्टि जनाएपछि प्रधानमन्त्री ओली र अध्यक्ष दाहालले उनका केही बुँदा मात्रै समावेश गराएका थिए।
नेता नेपालले मुख्य गरी पार्टीलाई विधि र पद्धतिमा सञ्चालन गर्नुपर्ने माग गरिरहेका छन्। उनले पार्टीलाई विधि र पद्धतिमा सञ्चालन गर्न ‘एक व्यक्ति, एक पद’को एजेण्डा उठाउँदै आइरहेका छन्। नेता नेपालले विधानको धारा ६० मा बहुमतको निर्णय पार्टी निर्णय भन्ने व्यवस्थालाई पनि कार्यान्वयन गर्नुपर्ने लगायतको बिषयमा कुरा उठाएका थिए। असार १० गतेबाट सुरु भएर साउन १३ गतेबाट अनिश्चितकालका लागि रोकिएको बैठक आज बसिरहेको छ।
आजको बैठकमा नेता नेपालसहित देव गुरुङ, घनश्याम भुसाल, लीलामणि पोख्रेल, भीम आचार्य, रघुजी पन्त, मातृका यादव, अष्टलक्ष्मी शाक्य लगायतले धारणा राखिसकेका छन्। कोरोनाको कारणले बैठक आजै ओली(दाहालको प्रस्ताव पारित गराएर सक्ने तयारी भइरहेको छ। बैठकमा ओली केहीबेर मात्रै बसेर अध्यक्ष दाहाललाई जिम्मेवारी सुम्पिएर बाहिरिएका छन्।
Discussion about this post