खोजखबर संवाददाता
बाँके भदौं १७ गते । नेपालगञ्ज उपमहानगरपालिकाका मेयर धवल शम्शेर राणाले असल नियतका साथ गाईहरु दैलेख पठाइएको दाबी गर्नुभएको छ । घटनाका समय राजधानीमा रहनुभएका मेयर राणाले आज मंगलबार पत्रकारहरुसँग अन्तरक्रियामा दुर्घटनावश दैलेख घटना भएको टिप्पणी गर्नुभयो । सडकमा दुर्घटना बढेपछि काञ्जिहाउस खाली गरेर त्यहाँ सडकका पशु चौपाय राख्ने योजना गाईहरु दैलेख पठाइएको मेयर राणाले भन्नुभयो । नेपालगञ्जबाट दैलेख लैजानेक्रममा केही पशुको मृत्यु भएको हो, यो असल नियतले गर्न खोज्दा घटना भयो, यसको सम्पूर्ण जिम्मा म लिन्छु । मेयर राणाले गाईलाई भिरबाट खसालेर हत्या गरेको आरोप सरासर गलत भएको भन्दै यो कसैले पनि सोच्न नसक्ने बताउनुभयो । मेयर राणाले सडकमा दुर्घटना बढेको, काञ्जि हाउसमा पनि पशुहरु मर्न थालेपछि दैलेख पठाउन लगिएको बताउनुभयो । छाडा पशु चौपायको समस्या नगरबासीकै समस्या भएको भन्दै उहाँले नेपालगञ्जको पहलमा जिल्ला समन्वय समितिले गौशाला निर्माणका लागि डिपिआर सुरु गरेको समेत बताउनुभयो । जिससले आकस्मिक कोषको सात करोड छुट्टाएको बताउनुभयो ।
सो अवसरमा बाँकेका पत्रकारहरुले भारतबाट आउने पशु चौपाय नियन्त्रणका लागि प्रशासनसँग समन्वय गर्न, नगरभित्र रहेका पशु चौपायको तथ्यांक संकलन गर्ने लगायतका सुझाव दिए । उपमेयर उमा थापा, प्रमुख प्रशासकीय अधिकृत हरी प्याकुरेल, प्रबक्ता प्रमोद रिजालसहित उपस्थित भएका मेयर राणाले शिक्षा, स्वास्थ्य, उद्योग ब्यापार र पर्यटन नेपालगञ्जको विकासका चार आधार भएको बताउनुभयो । उपमहानगरपालिकाले नगरका १३ स्थानमा हाइमाष्ट लाईट जडान गर्न लागेको भन्दै विगतमा ८ चौकका लागि विनियोजन भएको बजेट मध्ये ४० लाख फिर्ता भएको बताउनुभयो ।
Discussion about this post