कैलाली भदौ ३० गते ।
पाँच दिनअघि धनगढीमा संचालित दिनेश संचार गृहमै प्रवेश गरी पत्रकारमाथि सांघातिक आक्रमण गर्नेलाई कारवाहीको माग गर्दै कैलालीका पत्रकार आन्दोलित भएका छन् ।घटना भएको पाँच दिन बित्दासम्म पनि दोषीलाई पक्राउ गरिएको छैन । भदौ २६ गते समाचारको विषयलाई लिएर एक समूहले दिनेश संचार गृहमा प्रवेश गरी त्यहाँ कार्यरत पत्रकारलाई आक्रमण गरेको थियो ।
घटना लगत्तै दोषीलाई कारवाहीको माग गर्दै आएको नेपाल पत्रकार महासंघ कैलाली शाखाले घटनाको भोलिपल्ट अर्थात भदौ २७ गते स्थानीय प्रशासनलाई दोषीलाई पक्राउ गर्न २४ घण्टे अल्टिमेटम दिएको थियो । २४ घण्टे अल्टिमेटम पछि पनि आक्रमणकारी पक्राउ नभएपछि शाखाको अगुवाईमा पत्रकारको भेलाले चरणबद्ध आन्दोलन सुरु गरेको हो ।आन्दोलनकै क्रममा सोमबार सुदूरपश्चिम प्रदेशका मुख्यमन्त्री त्रिलोचन भट्टलाई घटनाका समन्धमा ध्यानाकर्षण पत्र बुझाईएको थियो ।
ध्यानाकर्षण बुझ्दै मुख्यमन्त्री भट्टले दिनेश सञ्चारगृहमा आक्रमण गर्दै पत्रकारमाथि कुटपिट गर्नेहरुलाई कारवाही हुने बताए ।सञ्चारगृहमाथि आक्रमण भएको जानकारी पाउने वित्तिकै आफूले प्रहरी, प्रशासनसँग कुराकानी गरेको उनले बताए । समाचारप्रति असन्तुष्टि भए कानूनी उपचारको बाटो खुला भए पनि सञ्चारगृहमै आक्रमण गर्नु दुःखद भएको मुख्यमन्त्री भट्टले बताए ।नेपाल पत्रकार महासंघ कैलाली शाखाका अध्यक्ष जगद साउदले ध्यानाकर्षण बुझाउँदै आक्रमण भएको चार दिनसम्म पनि संलग्न पक्राउ नपरेको बताउँदै दोषीमाथि कारवाही हुनुपर्ने माग गरे ।
यता, कारवाहीको माग गर्दै नेपाल पत्रकार महासंघ जिल्ला शाखा कैलालीले आन्दोलन जारी राखेको छ । पीडित पक्षले कुटपिट गर्नेलाई कारवाहीको माग गर्दै किटानी जाहेरी दिए पनि प्रहरीले संलग्नलाई पक्राउ नगरेको भन्दै सोमबार बिहान साढे ९ बजेदेखि ११ बजे सम्म जिल्ला प्रशासन कार्यालय अगाडि धर्ना दिइएको थियो । आन्दोलनकै क्रममा मंगलबार सुदूरपश्चिम प्रदेश आन्तरिक मामिला तथा कानून मन्त्रालयमा बिहान १० देखि ११ बजे सम्म धर्नाको कार्यक्रम रहेको छ ।‘
आक्रमण भएको पाँच दिन पुगिसकेको छ’ पत्रकार महासंघ कैलाली शाखा अध्यक्ष जगत साउदले भने– ‘प्रहरीले आक्रमणकारीलाई पक्राउ गर्न चासो नै दिएको देखिएन । प्रहरी प्रशासनको भूमिकामाथि आशंका गर्ने ठाउँ देखियो ।’ अध्यक्ष साउदले आजको धर्ना पछि बेलुकासम्म पनि आक्रमणकारीलाई पक्राउ गरिएन भने थप संघर्षका कार्यक्रमसहित अघि बढ्ने बताएका छन् ।
कैलालीका प्रमुख जिल्ला अधिकारी यज्ञराज बोहराले आक्रमणकारीलाई पक्राउ गर्न घटना लगत्तैदेखि प्रहरी परिचालन गरिएको बताउँछन् । उनले भने–‘घटना समन्धमा हामी निकै गम्भीर छौँ, आक्रमणकारीलाई पक्राउ गर्न प्रहरी परिचालन गरेका छौँ ।’
Discussion about this post