खोजखबर संवाददाता
बाँके भदौ १९ गते । औषधी उपचार लगायत विभिन्न काम बिशेषले भारतको लखनउ जान चाहने नेपाली यात्रुहरुकोे सुविधाकालागि नेपालगन्जबाट सिधै लखनउ बस सेवा संचालन गरिने सम्झौता भएको छ । भारत उत्तर प्रदेश परिवरहन निगम रोडवेजसंग सो सम्झौता गरिएपछि अब नेपालगञ्जदेखि लखनउसम्मको लागि आरामदायी बस सेवा नेपालगञ्जबाटै सञ्चालनमा आउने छ ।
हालै मात्र भेरी यातायात प्रालिका अध्यक्ष राजेन्द्र गिरिसहितको एक टोलीले भारतको लखनउमा गएर उत्तर प्रदेश परिवहन निगमसँग सम्झौता गरेर फर्किएकोले आगामी भदौ २२ गतेदेखि नेपालगञ्ज लखनउ सिधा बस सेवा सञ्चालन हुनेछ ।
नेपालगञ्ज तथा आसपासका जिल्लाहरुबाट औषधि उपचार तथा किनमेलका लागि लखनउ जानेहरुको सुविधालाई ध्यानमा राखेर भेरी यातायात प्रालिले नेपालगञ्ज लखनउ सिधा बस सेवा सञ्चालन गर्ने जनाएको छ ।
भेरी यातायात प्रालिले यस अघि नेपालगञ्ज दिल्ली नेपाल भारतमैत्री बस सेवा सञ्चालन गर्दै आएको छ । नेपालगञ्जको कारकाँदो चौकमा टिकट काउन्टर राखेर नेपालगञ्जबाट लखनउको लागि विहान ८ बजे र लखनउको केशरबागबाट राती सवा ९ बजे बस छुट्ने भेरी यातायात प्रालिका अध्यक्ष राजेन्द्र गिरिले जानकारी दिनुभयो ।
उहाँले सो बस सेवाबाट नेपालीहरुलाई आरामदायी र सुरक्षित यात्राका साथै सीमानाको विभिन्न झन्झटबाट पनि मुक्ति मिल्ने आशा लिईएको छ ।
Discussion about this post