सरला सुवेदी
बाँके असोज ३० गते ।
बाँकेको कोहलपुरमा कारोबार र माग दुवै नभए पनि अहिले सुनचाँदी व्यवसायीले पसल खोल्छन् । तर गहना बनाउँदै किन्ने मानिसहरु आउँदैनन् । बाँके सुन चाँदी तथा गहना व्यवसायी संघका संस्थापक अध्यक्ष बाल कृष्ण विश्वकर्माले भने,–‘पसल नखोलौँ भने एक जना भए पनि ग्राहक आउलान् भन्ने आश हुन्छ । पसल खोलेर बस्दा कोही आउँदैनन् ।’
बाँकेको कोहलपुरमा कोरोनाको जोखिमसँगै भएको लकडाउनले सुनचाँदी व्यवसाय पनि ओरालो लागेको छ । लकडाउनपछिको यो ६ महिनामा सुनचाँदीको व्यवसायीहरु सबैभन्दा बढी घाटा वेहोर्नु परेको छ । लकडाउनपछिको यो ६ महिनाको अवधिमा सुनचाँदीको व्यवसायमा अनुमानित ६० करोड भन्दा बढीको घाटा भएको संघका संस्थापक विश्वकर्माले बताए ।
विश्वव्यापी रुपमा फैलिएको कोरोना भाइरसको संक्रमणका कारण कोहलपुरको अर्थतन्त्र शिथिल बन्दै गइरहेका बेला सुन व्यवसायमा पनि नराम्रोसँग असर देखिएको संस्थापक अध्यक्ष विश्वकर्माले बताए । कोरोना कहरसँगै कोहलपुरमा सुनको भाउ लगातार बढेपछि पनि कारोबार ठप्प भएको छ । उनले भने,–‘सुनको मात्रै होइन, हरेक क्षेत्रको कारोबार पनि ठप्प छ । पहिले मानिसहरु खाना, नाना, छाना अनि गहना हुन्थ्यो तर कोरोनाका करण गहना पछारियो । सुनको कारोबार खुम्चिएको छ ।’ सरकारले लकडाउन खुल्ला गरेपनि कोहलपुरमा कोरोनाको असर देखिएकाले कोहलपुर नगरपालिकाले जारी गरेको निषेधाज्ञाले सबैभन्दा बढी कारोबार हुने तीज पर्वमा समेत सुन बजार प्रभावित भएको विश्वकर्माको भनाई छ ।
यो अवधिमा सुन बजारले अर्बको बराबरको घाटा बेहोरेको छ । लकडाउन भएको अवधिभरी केही सुन व्यवसायी पलायन हुनुपर्ने अवस्था आएको उनले बताए । विश्वकर्माका अनुसार लकडाउन अवधिभर धेरै कालिगढहरुले रोजगारी समेत गुमाउनु परेको छ । कारोबार गर्न नपाए पछि व्यवसायीको घरभाडा, बैंकको ब्याज, कर्मचारी खर्च र परिवार खर्च लगायतको खर्च बेहोर्न मुस्किल परेको छ । सुनको कारोबार मासिक रुपमा १० करोड रुपैँयाँ बराबरको कारोबार हुँदै आएको छ । लकडाउनको अवधिमा सुन तथा चाँदीको कारोबारमा अर्ब बराबरको क्षति भएको संस्थापक अध्यक्ष विश्वकर्माले बताए ।
कोहलपुरमा सुन तथा चाँदीको बजार राम्रै थियो । लकडाउनको अवधिमा चाँदीको नयाँ मूल्य निर्धारण भएको छैन । चैत्र महिनामा कायम भएको सुनको भाउ छापावाल ७७ हजार र तेजाबी ७६ हजार ७ सय रहेको छ । चाँदीको भाउ प्रतितोला ७ सय २० रुपैँयाँ रहेको थियो ।
चैत १० गते तोलाको ७७ हजार रुपैयाँमा कारोबार भएको सुन असार मसान्तमा ९२ हजार ८ सय रुपैयाँ पुगेको थियो । हाल स्थानीय बजारमा ९७ हजार १ सयको हाराहारीमा कारोबार भैरहेको छ । उनी भन्छन,–‘एक त दिनदिनै सुनको भाउ बढ्दै गएको छ । अर्काे तिर कोरोनाको सन्त्रासले मानिसहरु घरभन्दा बाहिर खुलेर निस्कन सकेका छैनन् । त्यसैले पनि अहिले मानिसहरुले सुन किन्ने आँट गर्न सकेका छैनन् ।’ उनले अन्तर्राष्ट्रिय बजारमा सुनको भाउ बढेपछि नेपालमा पनि सुनको भाउ त्यही अनुसारले वृद्धि हुने गरेको बताए ।
यहाँ राष्ट्रिय तथा अन्तराष्ट्रियस्तरका हरेक प्रकारका गरगहनाहरु बनाईन्छ्न् । कोहलपुरमा अधिकांश कालिगढ भारतबाट आएका छन् । लकडाउन भएपछि उनीहरु पनि आफ्नो घर फर्किए । सुनको कारोबार ठप्प भएपछि सुन पसलमा कार्यरत अधिकांश कालिगढले रोजगारी गुमाए । लकडाउनले भारतीय कालिगढ घर फर्किएकाले अहिले सुनको माग भईहाल्यो भने पनि कालिगढको अभाव हुने उनले बताए । तर माग नै नभएकाले भएकै कालिगढ पनि कामबिहीन भएका छन् ।
Discussion about this post