बाँके कार्तिक ५ गते ।
लुम्बिनी प्रदेशका मुख्यमन्त्री शंकर पोखरेलले कार्ययोजना अनुसार काम गरी विनियोजन भएको बजेट खर्च गर्नमा कुनै ढिला सुस्ती नगर्न मन्त्री र सचिवहरुलाई निर्देशन दिएका छन । बजेट कार्यान्वयनका लागि तीन महिनामा भएका कामबारे मन्त्री र सचिवहरुसंग मंगलवार भएको भर्चुअल बैठकमा कोभिड—१९ को कारण देखाएर विनियोजन भएको बजेट खर्चमा ढिलासुस्ती नगर्न मुख्यमन्त्रीले निर्देशन दिएका हुन ।
‘असहज अवस्थालाई सहज बनाउँदै काम गर्ने हो, समस्या पहिचान गरी समाधान गर्दै कार्ययोजना अनुसार काम हुनुपर्छ’ – उनले भने । कार्ययोजना अनुसार काम गर्ने र बजेट खर्च गर्ने प्रणालीको विकास गर्न सक्दा आगामी दिनहरुमा सरकारका काम अझै प्रभावकारी हुने उनले बताए । उनले गत आर्थिक बर्षमा लुम्बिनी प्रदेशले ८० प्रतिशत पूँजीगत खर्च गरेको र अहिले त्योे भन्दा धेरै राम्रो गर्नुपर्ने बताए ।
उनले उद्योग, वन तथा वातावरण मन्त्रालयलाई बहुमूल्य नर्सरीको स्थापना गरी निःशुल्क विरुवा वितरण गर्ने गरी अघि बढ्न निर्देशन दिए । विगतमा वृक्षारोपण अभियान अघि बढेको तर त्यसको प्रभावकारिता सिंगो प्रदेशमा प्रभावकारी नभएकोले त्यसको कारण खोज्न र वृक्षारोपण अभियानलाई प्रभावकारी बनाउनुपर्ने बताए । कोरोना संक्रमणले कतिपय मन्त्री र सचिव आइसोलेसनमा रहेकोले मन्त्री र सचिवहरुसंग भर्चुअल मार्फत बैठक गरिएको हो ।
Discussion about this post