खोजखबर संवाददाता
बाँके भदौ २१ गते । बेरोजगारहरुलाई रोजगारी दिलाउने उदेश्यले नेपालगन्जमा रोजगारी पसल शुरु गरिएको छ ।
नेपालगन्ज उपमहानगरपालिकाका प्रमुख डा. धवल शमसेर राणाले सो शाखाको शनिवार यहाँ उद्घाटन गर्नु भयो । सो अवसरमा बोल्दै उहाँले रोजगारी पसलले नेपालगन्जमा शाखा खोलेपछि धेरै बेरोजगारले रोजगार पाउने आशा व्यक्त गर्नुभयो ।
सो अवसरमा नेपालगन्ज उद्योग बाणिज्य संघका अध्यक्ष नन्दलाल वैश्यले रोजगारी पसलले शिप र योग्यता भएका युवाहरुलाई स्वदेशमै रोजगारी दिलाउन सहेयाग गर्ने सुन्दा खुशी लागेको बताउनु भयो ।
रोजगारी पसलका प्रबन्ध निर्देशक शैलेन्द्रराज गिरीले रोजगारदाता र कामदारविच समन्वय गराउने काम रोजगारी पसलले गर्ने जानकारी गराउनु भयो ।
सो अवसरमा होटल व्यवसायी संघ बाँकेका अध्यक्ष भिम कँडेल, शिप प्रोजेक्टका प्रतिनिधि र पत्रकारहरुको उल्लेख्य उपस्थिति रहेको थियो ।
काठमाण्डौमा केन्द्रिय कार्यालय रहेको रोजगारी पसलका शाखाहरु पोखरा र इटहरीमा यसअघिनै सञ्चालनमा रहेका छन् । केही दिन भित्रै बिरगन्जमा पनि रोजगारी पसल खोल्ने तयारी भैरहेको रोजगारी पसल नेपालगन्जका प्रमुख उपेन्द्र यादवले बताउनु भयो ।
Discussion about this post