बाँके मंसिर १० गते ।
बाँकेको डुडुवा गाउँपालिकामा ठूलो संख्यामा काँग्रेस र जसपा पार्टी परित्याग गरेर नेकपामा प्रवेश गरेका छन् । आज डुडुवा गाउँपालिका ३ हडवलडोलीमा आयोजित कार्यक्रममा चारसय बढी पार्टी परित्याग गरेर नेकपामा प्रवेश गरेका हुन् ।
नेकपा डुडुवा पालिकाका संयोजक सकिल अहमद खाँको अध्यक्षतामा भएको मोहम्मद डे, विजयादशमी, तिहार, नेपाल सम्बत, गुरुनानक जयन्तीको अवसरमा आयोजित कार्यक्रममा बोल्ने सहभागीहरुले देशको निकास र विकासका लागि नेकपाको विकल्प नभएको बताउनुभयो । कार्यक्रममा बोल्दै नेकपाका केन्द्रीय सदस्य तथा संघीय सांसद महेश्वर गहतराजले नेकपाभित्रको विवाद चर्किरहेका बेला नेकपा डुडुवाले गतिलो सन्देश दिएको बताउनुभयो ।
केन्द्रमा नेतृत्वबीच देखिएको विवादका बीच गरिएको यो कार्यक्रम नेतृत्वलाई मिल्नका लागि सुझाव भएको समेत उल्लेख गर्नुभयो । उहाँले नेकपालाई एकताबद्ध बनाएर लैजाने दायित्व पार्टी प्रवेश गर्नेहरुको दायित्व भएको बताउनुभयो । नेकपामा प्रवेश गर्ने साथीहरु अव एमाले पनि नभएको र माओवादीपनि नभएको उल्लेख गर्नुभयो । पार्टी एकतामा दवाव दिन पनि उहाँले आग्रह गर्नुभएको छ ।
उहाँले विकास निर्माणमा भएको ढिलासुस्ती प्रति गम्भीर असन्तुष्टि व्यक्त गर्नुभयो । संघीय सरकारले पठाएको रकमको सहि सदुपयोग हुन नसकेकोमा उहाँले आक्रोस पोख्नुभयो । उहाँले सडक कालोपत्रे समेत नहुनु दुखद भएको जिकिर गर्नुभयो । विकास र सम्बृद्धिलाई अगाडी बढाउन नसक्ने नेतृत्व र पार्टीले अहिले पालिका हाक्दा ठूलो समस्या आएको बताउनुभयो । उहाँले केन्द्रबाट आएको अनुदानलाई दाइजो जस्तो ठान्नु मुर्खतापूर्ण भएको उल्लेख गर्नुभयो ।
उहाँले यसको जवाफ अव अर्को चुनावमा दिने उल्लेख गर्नुभयो । स्थानीय सरकार नेकपाको हातमा ल्याउन नवप्रवेशीहरुको भूमिका हुने उल्लेख गर्नुभयो । नेकपाको हातमा पालिका नआएसम्म सुकुम्बासी, भूमिहिन, किसान र मजदुरहरुले अवसर नपाउने जिकीर गर्नुभयो । डुडुवा, नरैनापुर र जानकी गाउँपालिका सबैभन्दा पछाडी पारिएको पालिकाहरु रहेको बताउनुभयो । उहाँले यहाँको कोरिडर निर्माण गरेर यी पालिकाहरुलाई सम्बृद्ध बनाउन पनि आफ्नो तर्फबाट पहल भइरहेको बताउनुभयो ।
यस्तै प्रदेशसभा सदस्य तथा कृषि तथा सहकारीमन्त्री आरती पौडेलले किसानको हकहितका लागि प्रदेश सरकार प्रतिबद्ध रहेको बताउनुभयो । उहाँले सिक्टा सिंचाई आयोजनापछि डुडुवा पालिकाका किसानको मुहार फेरिने बताउनुभयो । डुडुवाको नहर निर्माण भइरहेकाले यसले यहाँका किसानलाई आकाशे खेतीबाट खेती गर्ने पीडाको अन्त्य भएको बताउनुभयो ।
कार्यक्रममा केन्द्रीय सदस्यहरु मोहम्मद हारुन, सिराज फारुकी, हज कमिटीका पुर्व अध्यक्ष ताज मिया, नेकपा बाँकेका सचिव अशोक कोइराला, नेताहरु निरक गुरुङलगायतले पार्टीभित्रको विवादलाई नेतृत्वले गम्भीर ढंगबाट सुल्झ्याउनु पर्ने बताउनुभयो । जनताले पार्टी फुटाउन भोट नदिएको भन्दै उहाँहरुले विकास र सम्बृद्धि कायम गरेर अघि बढ्न भोट दिएकाले फुटेपछि नेकपा सबै पत्तासाप हुने बताउनुभएका थिए । उहाँहरुले कार्यकर्ताहरुको सुझाव नेकपालाई एकतावद्ध भएको हेर्ने चाहना भएको बताउनुभयो ।
Discussion about this post