बाँके माघ ७ गते ।
नेपालगन्ज उपमहानगरपालिकाको राझाँ चोकमा प्रहरी बिट स्थापना गरिएको छ । नेपालगन्ज उपमहानगरपालिका वडा नं २० र जिल्ला प्रहरी कार्यालयको समन्वय र सहयोगमा प्रहरी बिट स्थापना गरिएको हो । प्रहरी बिटका लागि निर्माण गरिएको नव निर्मित भवनको बुधबार बाँकेका प्रहरी प्रमुख एवं प्रहरी उपरीक्षक ओम बहादुर रानाले उद्घाटन गर्नुभएको छ ।
उद्घाटन कार्यक्रममा बोल्दै एसपी रानाले शान्ति सुरक्षा कायम गर्ने सवालमा प्रहरीले कुनै काम बाँकी नराखेको बताउनुभयो । राँझामा प्रहरी विट नहुँदा प्रहरीलाई कार्य संचालनमा समस्या थियो । राँझा क्षेत्रमा चोरी, डकैतीलगायतका घटना हुँदै आएका छन । अव ती घटनामा कमी आउने उहाँको विश्वास छ । एसपी रानाले शान्ति सुरक्षाका लागि स्थानीयबासीको सहयोग महत्वपूर्ण हुने भएकाले आपसी सहयोग र समन्वय जरुरी रहेको बताउनुभयो ।
कार्यक्रममा बोल्दै वडा अध्यक्ष कृष्ण कार्कीले राँझामा विभिन्न थरीका मानिसहरुको बसोबास भएकाले सुरक्षाको जोखिम रहेको जानकारी दिनुभयो । अव प्रहरीको आफ्नै भवन बनेपछि उक्त चुनौति न्यूनिकरण हुने विश्वास व्यक्त गर्नुभयो । राँझामा यौनजन्य गतिविधि बढेको स्थानीयको गुनासो छ ।
त्यस्तै ट्यापे मुन्द्रेहरुको समेत चहलपहल बढ्न थालेपछि स्थानीय त्रसित हुँदै आएका थिए । नेपालगंज उपमहानगरपालिका वडा नं २०, वडा कार्यालय र स्थानीय भद्र भलाद्मी तथा ब्यावसायीहरुको सहयोगमा दुई कोठे प्रहरी भवन निर्माण गरिएको वडा अध्यक्ष कार्कीले जानकारी दिनुभयो ।
Discussion about this post