बाँके माघ १० गते ।
हाम्रो पूर्णिमा साहित्य प्रतिष्ठानको चौथो साधारणबाट कपिल न्यौपाने (अञ्जान) निर्विरोध अध्यक्षमा चयन भएका छन् ।
शनिबार भएको हाम्रो पूर्णिमा साहित्य प्रतिष्ठान कोहलपुर बाँकेको चौथो साधारण सभाबाट अञ्जान निर्विरोध अध्यक्षमा चयन भएका हुन् । अध्यक्षको पदग्रहण गर्दै नवनिर्वाचित अध्यक्ष अञ्जानले बाँके जिल्लामा नेपाली गजलको विकास र विस्तारका लागि लामो समयदेखि यस क्षेत्रमा सक्रिय भुमिका निर्वाह गरिरहेको बताएका छन् ।
नवनिर्वाचित अध्यक्ष अञ्जानले आगामी दिनमा पनि यस क्षेत्रमा दत्तचित्त भएर लाग्ने बताए । अञ्जान हाम्रो पूर्णिमा साहित्य प्रतिष्ठानमा आवद्ध भएर विगत लामो समयदेखि गजल लेखनमा सक्रिय छन् । उनका गजलमा विषयगत विविधताका साथै शैलिगत पृथक सृजना भएको पाइन्छ । अञ्जान गजलको उन्नयनमा मन, वचन र कर्मले लागि परेका छन् । अञ्जानले गजल कृति ‘तस्बिर’ समेत प्रकाशनमा ल्याईसकेका छन् । गजल विधामा रहेर लामो समयदेखि कलम चलाईरहेका अञ्जान पत्रकारिता पेशामा संलग्न छन् ।
उनलाई कुशल पत्रकार तथा भिडियो ग्राफरका रुपमा पनि चिन्न सकिन्छ । उनी हाम्रो पूर्णिमा साहित्य प्रतिष्ठानको आमन्त्रित सदस्य पनि हुन् । अञ्जानले आफ्ना रचना मार्फत सामाजिक विकृति, मनोमालिन्यता, ढिलासुस्ती, थिचोमिचो, स्वतन्त्रता, देशप्रेम, मेलमिलाप र सद्भावयुक्त भाव, बढ्दै गएको अराजकता र विसङ्गतिको विपक्षमा आवाज उठाउँदै आएका छन् । कसभाबाट प्रतिष्ठानको उपाध्यक्षमा प्रदिप भट्राई, सुमित्रा न्यौपाने, सचिब बद्री ढकाल ‘हिरामणी’ चयन भएका छन् ।
प्रतिष्ठानका तत्कालिन अध्यक्ष महानन्द ढकालको अध्यक्षता तथा त्रिभुवन विश्व विद्यालयका उपप्राध्यापक एंव बरिष्ठ साहित्यकार, समालोचक डा. मधुसुधन गिरी प्रमुख आथित्यतामा साधारण सभाको उद्घाटन भएको थियो । साधारण सभाको उद्घाटन सत्रमा यस क्षेत्रका राजनीतिज्ञ, समाजसेवी, उद्योगी व्यापारी, पत्रकार तथा साहित्यप्रमीहरुको सहभागिता रहेको थियो । कार्यक्रममा प्रतिष्ठानको वार्षिक प्रगति प्रतिवेदन तथा आगामी रणनीति बारे प्रतिवेदन प्रस्तुत गरिएको थियो ।
कार्यक्रममा विभिन्न स्रष्टाहरुले आफ्नो सिर्जना सुनाएका थिए, भने साहित्यकार सागर गैरेको उपन्यास ‘लकडाउन’ विमोचन गरिएको थियो । प्रतिष्ठानका सहसचिब केशव निमेषको स्वागत मन्तव्यबाट सुरु भएको उद्घाटन समारोहको संचालन सचिब पुष्कर रिजाल ले गर्नुभएको थियो।
Discussion about this post