काठमाडौं माघ २० गते ।
म्यानमारमा सेनाले कू गरि सत्ता हत्याएपछि त्यसको चौतर्फी विरोध भइरहेका बेला त्यसबारे छलफल गर्न संयुक्त राष्ट्रसंघीय सुरक्षा परिषदको बैठक बस्ने भएको छ । मंगलबार बस्ने बैठकमा सैन्य कू पछिको म्यानमारको अवस्थाबारे छलफल हुने जनाइएको छ । म्यानमारको सेनाले स्थानीय समय अनुसार सोमबार बिहानै सत्तारुढ नेशनल लिग फर डेमोक्रेसी (एनएलडी) पार्टीकी नेतृ आङ साङ सूकीसहित शीर्ष नेतालाई गिरफ्तार गरि सत्ता नियन्त्रणमा लिएको हो ।
सेनाले एक वर्षका लागि संकटकालको घोषणा समेत गरेको छ । गएको नोभेम्बर ८ मा भएको चुनावमा सूकीको पार्टी अत्याधिक बहुमत ल्याएर विजयी भएको थियो । तर सो चुनावमा धाँधली भएको आरोप लगाएको सेनाले निर्वाचित सांसदको पहिलो बैठक बोलाइएकै दिनको सबेरै सत्ता हत्याएको हो । म्यानमारमा भएको पछिल्लो राजनीतिक घटनाक्रमलाई मध्यनजर गरेर सो विषय छलफलको पहिलो प्राथमिकतामा ल्याउनु सुरक्षा परिषदका सदस्यहरु सहमत भएको संयुक्त राष्ट्रसंघमा बेलायती राजदूत बारबरा वूडवार्डले बताएकी छन् ।
म्यानमारमा भएको कू को पश्चिमा देशहरुले विरोध गरेका छन् । यस्तै विश्वका अरु क्षेत्रका विभिन्न देशले पनि सो घटनाको निन्दा गरेका छन् । सामाजिक सञ्जालमा पनि सो घटनाको विरोध भइरहेको छ । यसैबिच अमेरिकी राष्ट्रपति जो बाइडेनले सैन्य कू म्यानमारको प्रजातान्त्रिक प्रक्रिया र कानूनी शासनमाथिको सीधा आक्रमण रहेको भन्दै निन्दा गरेका छन् । बाइडेनले भनेका छन्, ‘अमेरिकाले गएको दशकमा प्रजातन्त्रको मार्गमा भएको प्रगतिलाई हेरेर बर्मामाथिको प्रतिबन्ध फुकुवा गरेको थियो ।
तर अहिलेको अवस्थालाई हेरेर हाम्रा प्रतिबन्ध सम्बन्धी कानूनहरु तत्काल हेरिनु पर्ने भएको छ र सोही अनुसार कार्य हुनेछ ।’ उनले सैन्य कू को फलस्वरुप म्यानमारमाथि प्रतिबन्ध लगाउन सकिने चेतावनी दिएका हुन् ।
Discussion about this post