खोजखबर संवाददाता
बाँके जेठ २६ गते ।
बाँकेको नरैनापुरका छोटी भन्सार अझै पुनःस्थापित हुन सकेका छैन्न । तत्कालिन माओवादी जनयुद्धका बेला यहाँका भन्सार नेपालगन्जमा विस्तापित भएका थिए । जनयुद्ध सकिएको डेढ दशक भैससक्दा पनि अझै ती भन्सार नरैनापुरमा स्थापना हुन सकेका छैनन ।
यहाँ छोटी भन्सार स्थापनाका लागि स्थानीय तह र सरकारका प्रदेश तथा संघीय जनप्रतिनिधी समेत उदासीन देखिएका छन । यसले नरैनापुर क्षेत्रमा मात्रै दैनिक लाखोंको राजश्व घाटा भैरहेको छ । द्वन्द्वकाल अघि नेपाल–भारत सीमा नाका अन्तरगत बाँकेको सुइया, नरैनापुर, भोज भगवानपुर, खडैचा, हिरमिनिया, साइगाउँ र उढरापुरमा छोटी भन्सार भएको गाउँपालिका अध्यक्ष इश्तियाक अहमद शाह बताउँछन ।
असुरक्षाको कारण देखाउँदै द्वन्द्वकालमा एकसाथ विस्थापित भएका छोटी भन्सार अहिलेसम्म पुनस्र्थापना हुन नसकेको उनी बताउँछन । उनका अनुसार भन्सार स्थापनाका लागि स्थानीय तहले समेत माग गरिरहेको छ । छोटी भन्सार नहुँदा नरैनापुरको नाका राज्यको उपस्थिति पनि शून्य जस्तै भएको छ । नाकामा छोटी भन्सार पुनस्र्थापना नहुँदा खुलेआम चोरी पैठारी हुने गरेको छ ।
अवैध रुपमा हुने चोरी निकासी नियन्त्रणका लागि सरकारले छोटी भन्सार भएका नाकामा सशस्त्र प्रहरी र जनपद प्रहरी खटिएको छ । तर, छोटी भन्सार नहुँदा सुरक्षाकर्मी मुकदर्शक जस्तै भएका छन् । छोटी भन्सार नहुँदा सर्वसाधारणले भारतबाट खुलेआम सामान ल्याउने गरेका छन् ।
अवैध रुपमा ल्याएको सामान जफत गरौँ बुझाउने ठाउँ नभएको सशस्त्र प्रहरी प्रहरी निरीक्षक धिरेन्द्र सिजापति बताउँछन । नेपालगन्ज–तत्कालीन नेकपा माओवादीले गरेको सशस्त्र द्वन्द्वकालमा विस्थापित भएका बाँकेका ७ वटा छोटी भन्सार पुनस्र्थापना नहुँदा अवैध चोरी पैठारी बढेको उद्योगी व्यवसायीहरूले बताएका छन् ।
नेपालगन्ज उद्योग वाणिज्य संघका महासचिव चिरन्जीवी ओली लामो समयदेखि छोटी भन्सार नहुँदा विभिन्न नाकाबाट अवैध सामान भित्रिने क्रम बढ्दै गएको बताउँछन ।भारतबाट तीनै नाका हुँदै ठूलो परिमाणमा खाद्यान्न, सिमेन्ट, कपडा, रेडिमेड र कस्मेटिकलगायतका सामान भित्रिने र पेट्रोल डिजेल लगायतका बस्तु नेपालबाट जाने गरेका छन ।
द्वन्द्वकालमा बन्द भएका भन्सार पुनस्र्थापना हुन नसक्दा दैनिक ५० लाख रूपैयाँभन्दा बढीको अवैध सामान नेपाल भित्रिने गरेको नरैनापुर गाउँपालिका–५, मटेहियाका राजेश दीक्षित बताउँछन । नेपालबाट पनि सुन, डिजेल, पेट्रोल, जडिबुटीलगायतका थुप्रै सामान अवैधरूपमा भारत निकासी हुने गरेको छ ।
१६ वर्षअघि तत्कालीन माओवादीले धम्की दिएको भन्दै सात ठाउँमा रहेका छोटी भन्सार कार्यालय विस्थापित भएको थियो । माओवादीबाट असुरक्षित भएको भन्दै कर्मचारी र सुरक्षाकर्मी नेपालगन्ज फर्किएपछि छोटी भन्सार कार्यालय बन्द भएको थियो ।
कर्मचारी नबसेपछि सबै भन्सार कार्यालयका भवन अहिले जीर्ण बनेका छन् । छोटी भन्सारका लागि निर्माण गरिएका भवन तरकारी खेती र गाई गोठको रूपमा प्रयोग हुँदै आएका छन् ।
Discussion about this post