खोजखबर संवाददाता भिम पौडेल
बाँके भदौ ३१ गते । सरकारी स्वामित्वमा रहेको नेपालकै पहिलो पोषण पुनस्र्थापना केन्द्र बाँकेमा आर्थिक बर्ष २०७६÷०७७ को साउन यता ३७ कुपोषित वालवालिकाले सेवा लिएका छन् । भेरी अस्पतालले सञ्चालनमा ल्याएको पोषण पुनस्र्थापना केन्द्र बाँकेमा गत आर्थिक बर्ष २०७५÷०७६ मा १ सय ७८ जना कुपोषित वालवालिकाले सेवा लिएको पोषण पुनस्र्थापना केन्दका ब्यबस्थापक दामोदर खनालले जानकारी दिए । उनले यही भदौ महिनामा १५ जना वालवालिकाले सेवा लिएको बताए । पोषण पुनस्र्थापना केन्द्रमा रुकुम, दाङ, बाँके, बर्दिया, जाजरकोट, कालिकोट लगायतका जिल्लाबाट कुपोषणबाट ग्रस्त वालवालिकाहरुको स्याहार भैरहेको ब्यबस्थापक खनालले बताए । उनले भेरी अस्पतालका डाक्टरको सिफरिसमा पोषण पुनस्र्थापना केन्दमा भर्ना गर्ने गरिएको बताउदै वालवालिकाहरु पूर्ण रुपले तन्दुरुस्त नहुँदा सम्म पोषणयुक्त खाना, बस्ने र आबश्यक उपचार सहितको ब्यबस्था हुने बताए ।
कुपोषण भएर आएका वालवालिकालाई ओपिडिबाट डाक्टरले सिफारिस गरे अनुसारको औषधी दिनुका साथै उनीहरुलाई तौल अनुसारको क्यालोरी युक्त दिनमा ४ पटक खाना दिने गरेको अनमी सरस्वती आचार्यले बताईन् । उनले प्रोटिन इनर्जी भनेर हरेक बार खाना चार भनेर ४ किसिमका क्यालोरी पाईने खाना, प्रोटिन पाईने खाना, शरिरलाई सुरक्षा गर्ने खाना र फ्याट युक्त खाना कुपोषण भएका वालवालिकालाई दिईने बताईन् । बच्चाको अवस्था हेरी ४ देखि ७ पटक सम्म जाउलो देखि फलफूल सम्म दिने गरेको अनमी आचार्यले जानकारी दिईन् ।
अशिक्षा, अज्ञानता, श्रोत साधनको अभाव र आर्थिक स्थिति कमजोर हुनाले पनि वालवालिकाहरु पोषणयुक्त खाना नपाएर कुपोषित हुन बाध्य हुन्छन् । वालवालिकाहरुको पोषणयुक्त खाना खान पाउने अधिकार र बाँच्न पाउने अधिकार सुनिश्चित गर्ने दायित्व राज्यको हो । यस्तै पुनस्र्थापना केन्द्र हरेक क्षेत्र बर्गको केन्द्र पर्ने स्थानमा स्थापना गर्न जरुरी छ ।
Discussion about this post