बाँके भदौ २४ गते ।
यसपालीको तीजमा रौनकता देखिएको छ । गएको वर्षको तीजमा कोरोना भाइरस महामारीका कारण महिलाहरुको चहलपहल निकै कम थियो । तर यसपालि भने जोखिमकै बीचपनि शहरदेखि गाउँसम्मै महिलाको चहलपहल बढेको छ ।
यसवर्ष कोरोना संक्रमण कम हुँदै गएको र निषेधाज्ञा पनि हटेको कारण पोहोरको तुलनामा तीजको रमझम र चलहपहल धेरै छ । पश्चिम नेपालको प्रसिद्ध शक्तिपीठ बागेश्वरी मन्दिरमा विहानैदेखि दर्शनार्थी महिलाको घुइचो लागेको छ ।
अघिल्लो वर्षको तीजमा बन्द रहेको बागेश्वरी मन्दिर योपटक भने खुल्लै छ । रातो रङमा सजिएका हर्षित, उत्साहित विवाहित तथा अविवाहित महिलाहरूको बाक्लै उपस्थिति देख्न सकिन्छ ।कतिपय महिलाका लागि यो धार्मिक चाड हो भने कतिपयका लागि राम्रो लगाउने, मीठो खाने र स्वतन्त्रताको प्रतीक पनि हो ।
यो मन्दिरमा पुजापाठ गर्ने महिलाहरु नाँचगानमा समेत व्यस्त भएका छन् । पुजापाठ गर्ने र दिनभर नाँचगान गरेर रमाइलो गरी पर्व मनाइरहेको नेपालगन्ज धम्वोझिकी रिता रावतले बताउनुभयो ।
अघिल्लो वर्ष कोरोनाको डरका कारण घर बाहिर ननिस्कएको भन्दै उहाँले यो पालि भने सबै परिवार नै मन्दिरमा आएर रमाइलो गरिरहेको बताउनुभयो । गाउँघर तिरपनि नाँचगान भइरहेका छन् । टोल, छरछिमेक जम्मा भएर सामुहिकरुपमै तीज पर्व मनाउनेक्रम चलिरहेको छ ।
स्थानीय प्रशासनले भाइरस संक्रमणको जोखिम कायमै रहेको भन्दै सामुहिकरुपमा तीज नमनाउन सार्वजनिकरुपमै अपिल गरेपनि तीजमा रमाइरहेका महिलाहरुले त्यसलाई भने ध्यान दिएका छैनन् ।
विज्ञहरुले जोखिम कायमै रहेकाले स्वास्थ्य मापदण्ड पालना गरेर तीज पर्व मनाउन आग्रह गरेका छन् । सकेसम्म घरमै मनाउन र भौतिक दूरी कायम गर्न उनीहरुको आग्रह छ । जनस्वास्थ्यको मापदण्ड पालना गर्दैहरितालिका तीजको मौलिकता र सांस्कृतिक महत्वको जगेर्ना गर्न विज्ञहरुको सुझाव छ ।
Discussion about this post