बाँके असोज ११ गते ।
बाँके प्रहरीले पर्व लक्षित सुरक्षा योजना लागू गरेको छ । दशैं, तिहार र छठ पर्वलाई लक्षित गरेर विशेष सुरक्षा योजना लागु गरिएको बाँकेका प्रहरी प्रवक्ता मधुसुदन न्यौपानेले बताउनुभयो ।
सम्भावित घटना तथा दुर्घटनालाई ध्यानमा राखेर विशेष सुरक्षा योजना बनाउँदै जिल्लाभर लागु गरिएको उहाँको भनाइ छ ।
न्यौपानेले दशैं, तिहार र छठ पर्वका बेला हुनसक्ने चोरी, डकैती, ठगी लगायतका आपराधिक गतिविधिलाई ध्यान दिंदै सुरक्षा योजना लागु गरिएको बताउनुभयो ।
बाँके जिल्ला भरी नै एकीकृत सुरक्षा योजना बनाइएको र जिल्ला भरी नै विशेष टोली परिचालन गरिएको प्रहरी प्रवक्ता न्यौपानेले बताउनुभयो ।
प्रहरीले जमुनाहा नाकादेखि कोहलपुरसम्म विभिन्न स्थानमा नागरिक सहायता कक्ष स्थापना गर्ने, राजमार्ग क्षेत्रमा रिफ्रेस सेन्टर स्थापना गर्ने, राजमार्ग क्षेत्रमा सरप्राइज चेकिङ गर्ने, स्थानीय प्रशासनसँगको समन्वयमा बजार अनुगमन गर्ने विषयलाई समेत सुरक्षा योजनामा समेटेको प्रवक्ता न्यौपानेले अनलाइन खोजखबरलाई बताउनुभयो ।
चाडपर्वका बेला बाँके जिल्लाभर झण्डै १ सय ५० प्रहरी परिचालन गरिने बताउँदै उहाँले चाडपर्वलाई सुरक्षित र सुशभ्य भएर मनाउन आग्रह गर्नुभयो ।
चाडपर्वको नाममा जुवातास खेल्ने प्रवृति रहेकोले त्यसले परिवार तथा समाजमा पार्ने नकारात्मक असरलाई रोकथाम गर्न सादा पोषाकमा प्रहरी परिचालन गरिएको पनि उहाँको भनाइ छ ।
यस्तै उहाँले चाडपर्वको बेला भारतबाट स्वदेश फर्किने नागरिकहरुको सुरक्षाका लागि ठाउँठाउँमा सहायता कक्षा राख्ने तयारी भइरहेको पनि बताउनुभयो ।
ती नागरिकहरुलाई रिक्सा तथा होटलहरुले अनावश्यक पैसा लिने गरेको गुनासो आएको भन्दै उहाँले त्यसलाई रोक्न प्रहरी परिचालन गरिएको बताउनुभयो ।
चाडपर्वको बेला मापासेको प्रयोग गरेर सवारीसाधन चलाउने गरेको भन्दै उहाँले ट्राफिक प्रहरीसँग सहकार्य गरेर चेकजाँचलाई कडाइ गरिएको बताउनुभयो ।
Discussion about this post