जावेद अन्सारी
बाँके असोज १७ गते ।
नेपालगन्जको जमुनाह नाकामा लगाइएको रोक पूर्णरुपमा हटेको छ । आजदेखि दुवै देशका सवारी साधान निर्वाधरुपमा आउजाउ गर्न दिइएको छ ।
नेपाली नम्वर प्लेटका जीपकार, मोटरसाइकल, रिक्सा, साइकलहरु आजैदेखि रुपैडिया जान र भारतीय नम्वर प्लेटका प्राइभेट सवारी साधन पनि आउन दिइएको जमुनाह प्रहरीले जनाएको छ ।
नाका सुचारु हुँदा दुवै देशका नागरिकहरुले खुसी भएका छन् । सहज तरिकाले आउजाउ गर्न पाइने भएपछि उनीहरु खुसी भएका हुन् ।
नेपालगन्जकी स्थानीय उषा गौतमले नाका संचालन हुँदा निकै खुसी भएको बताउनुभयो ।
यस्तै भारतबाट नेपाल प्रवेश गर्दै गरेका अवदेश कुमारले पनि हर्षित भएको प्रतिक्रिया दिनुभयो ।
कोरोना प्रभावपछि भारतीय सवारी नेपाल प्रवेश र नेपाली सवारी भारत प्रवेशमा रोक लगाउँदै आइएको थियो । विगतमा खाद्यान्न लगायतका सामग्री बोक्ने सवारी साधन निर्वाध रुपमा सञ्चालन भएपनि निजी गाडी नेपाल प्रवेशमा भने रोक लगाइएको थियो ।
नेपालगन्ज भन्सार कार्यालयका प्रमुख जयबहादुर भण्डारीले आजदेखि भन्सार नाका पूर्ववत अवस्थामा सुचारु भएको अनलाइन खोजखबरलाई जानकारी दिनुभयो ।
सरकारको निर्णय अनुसार नाका सुचारु भएको उहाँको भनाइ छ । यसअघि नाकामा पैदलयात्रुलाई आउजाउ गर्न मात्र दिइएको थियो ।
भारतबाट आउने नागरिकको हटमा भने ७२ घण्टे पीसीआर रिपोर्ट अनिवार्य गरिएको सशस्त्र प्रहरी पोष्ट जमुनाहका इन्चार्ज जीवनलाल बुढाले जानकारी दिनुभयो ।
स्वास्थ्यको मापदण्ड पालना गरेर नाका संचालनमा आएको उहाँको भनाइ छ ।
गत ११ गते बसेको संघीय मन्त्री परिषद्को बैठकले विभिन्न मापदण्ड पुरा गरेर भारतीय नीजि सवारीलाई नेपाल प्रवेश गर्न दिने निर्णय गरेको थियो ।
सोही निर्णय अनुसार जमुनाह नाका भएर पनि सवारी साधन संचालनको अनुमति दिने निर्णय भएको हो ।
Discussion about this post