जावेद अन्सारी
बाँके असोज २२ गते ।
नेपाल पत्रकार महासंघका केन्द्रिय अध्यक्ष बिपुल पोखरेलले संचार सस्थाले पत्रकारको श्रमको उचित मुल्यांकन गर्नुपर्ने बताउनुभएको छ। नेपाल पत्रकार महासंघ बाँकेले आज आयोजना गरेको पत्रकारहरुको दुर्घटना वीमा सम्झौता, कोभिड सम्मान तथा दसैं शुभकामना आदानप्रदान कार्यक्रमलाई सम्वोधन गर्दै उहाँले संचार सस्थाहरु श्रम शोषण गर्ने थलो बन्न नहुने सुझाव दिनुभयो ।
यस्तै पत्रकार महासंघ बाँकेका अध्यक्ष दामोदर भण्डारीले दर्ता नभएका अनलाइन, पत्रपत्रिका संचालन गरे साइवर क्राइमको भागीदार बन्नु पर्ने चेतावनी दिनुभयो । उहाँले पेशागत मर्यादा विपरीत कार्य गर्ने पत्रकारलाई कारवाही गरिने चेतावनी दिनुभयो । उहाँले नाकामा गएर फोटो खिच्ने, तर्साउने र धम्क्याउने कार्य नगर्न र त्यस्तो कार्य गर्ने पत्रकारलाई कारवाही गरिने बताउनुभयो ।
पत्रकारको आचारसंहिता विपरीत कार्य गर्ने कुनै पनि पत्रकार, त्यो पत्रकार हुनै नसक्ने बताउनुभयो । पत्रकारको क्षमता अभिवृद्धि गर्न महासंघले विशेष जोड दिएको उहाँको भनाइ छ ।
पत्रकार महासंघ बाँकेले जिल्लाका तीनसय बढी पत्रकारको दुर्घटना वीमा गराएको छ । महासंघले २ लाख बराबरको दुर्घटना वीमा सम्झौता गरेको महासंघ बाँकेका अध्यक्ष दामोदर भण्डारीले बताउनुभयो । कार्यक्रममा चिकित्सकसहित झन्डै एक दर्जन व्यक्तिहरुलाई सम्मानित गरिएको थियो ।
नेपालगन्ज मेडिकल कलेजका फिजिसियन डा सुभाष योगी, स्वास्थ्य कार्यालय बाँकेका खोप अधिकृत भेषराज शर्मा, जिल्ला आपतकालिन कार्य संचालन केन्द्रका सूचना व्यवस्थापन अधिकृत रुपन ज्ञवाली, स्वास्थ्य कार्यालय बाँकेका अधिकृत नरेश श्रेष्ठ, जिल्ला कोभिड १९–व्यवस्थापन केन्द्रका फोकल पर्सन तेज वली, कोहलपुर नगरपालिकाका स्वास्थ्य शाखाका ल्याव टेक्निसियन दिपक शर्मा, जे शर्मा मेडिकलका संचालन जिवन शर्मालाई सम्मानित गरिएको हो ।
यस्तै वडा प्रहरी कार्यालय बाँकेका इन्चार्ज डिल्ली खड्का, गैसस महासंघ बाँकेका अध्यक्ष नमस्कार शाह, व्यवसायी विवेकराज भण्डारी र दिपेन्द्र विष्टपनि सम्मानित हुनुभएको छ । सम्मानित व्यक्तिहरुले कोभिड महामारीमा पत्रकारहरुलाई विभिन्न खाले सहयोग पु¥याएको महासंघले जनाएको छ ।
महासंघ बाँके शाखा अध्यक्ष भण्डारीको सभापतित्वमा भएको कार्यक्रममा महासंघका लुम्बिनी प्रदेशका उपाध्यक्ष शुक्रऋषि चौलागाई, बाँकेका प्रमुख जिल्ला अधिकारी शिवराम गेलाल, बाँकेका एसपी श्यामकृष्ण अधिकारी, महासंघ बाँकेका सल्लाहाकार डक्ट धिताल, प्रेस चौतारीका अध्यक्ष हेमन्त विक, युनियनका अध्यक्ष अर्जुन वली, प्रेस मंचका आशिष गुप्ता, लगायतले आआफ्नो धारणा राख्नुभएको थियो ।
Discussion about this post