बाँके असोज २३ गते ।
चाडपर्वलाई लक्षित गरेर बाँके प्रहरीले चेकजाँचलाई कडाइ गरेको छ । दर्सै, तिहार छठ लगायतका पर्वलाई लक्षित गरेर विशेष सुरक्षा योजना लागू गरेको बाँके प्रहरीले आज नेपालगन्ज उपमहानगरपालिका १५ जमुनामा कुकुरबाट चेकजाँच सुरु गरेको हो ।
जिल्ला प्रहरी कार्यालय बाँके, तालुक कर्णाली प्रदेश प्रहरी केनाईन शाखा सुर्खेत (हाल कोहलपुर), इप्रका जमुनाह र जयसपुरको टोलीले चेकजाँच गरेको हो ।
भारतबाट हुन सक्ने आपराधिक घटना नहोस् भन्ने उद्देश्य र अर्कोतर्फ छिटोछरितोका लागि कुकुरबाट चेकजाँच सुरु गरिएको प्रहरीले जनाएको छ। लभ र व्यूटी नामक कुकुरले चेकजाँच सुरु गरेका हुन् ।
भारतबाट नेपाल तर्फ र नेपालबाट भारत तर्फ आवत जावत गर्ने सवारी साधन, पैदल यात्रीहरुलाई संयुक्त रुपमा चेकजाँच गरिएको जिल्ला प्रहरी कार्यालय बाँकेका प्रहरी निरीक्षक इश्वरदेव गिरीले जानकारी दिनुभयो ।
विगतको वर्षभन्दा यसपटकको सुरक्षा योजनालाई प्रविधिमैत्री बनाइएको पनि उहाँले बताउनुभयो । नगरका सिसिटिभीलाई मर्मत गरेर संचालनमा ल्याउने काम भइरहेको उहाँको भनाइ छ ।
त्यस्तै छड्के चेकजाँचलाई पनि तीब्रता दिइएको छ । यस्तै भारतबाट फर्किरहेका नेपालीहरुलाई लक्षित गरेर नागरिक सहायता कक्ष संचालनमा ल्याइएको बताउनुभयो ।
कर्णाली प्रदेश प्रहरी केनाईन शाखाका प्रहरी निरीक्षक बासुदेब सुवेदीले खासगरी कुकुरबाट हुने चेकजाँचमा हत्या, लुटपाट र लागु औषध तस्करहरु पक्राउ गर्न सहज हुने बताउनुभयो ।
चाडपर्वलाई लक्षित गरेर बाँके प्रहरीले थप डेढ सय सुरक्षाकर्मी परिचालन गरेको जनाएको छ ।
Discussion about this post