जनकपुरधाम मंसिर २९ गते ।
प्रदेश २ मा प्रमुख प्रतिपक्षी दल लोकतान्त्रिक समाजवादी पार्टीले प्रदेशसभा बैठक अवरुद्ध गरेको छ। बुधवार बसेको प्रदेशसभा बैठकमा सामाजिक विकासमन्त्री नवलकिशोर साहले सरकारको अध्यादेश पेश गर्न लाग्दा लोसपाले बैठक अवरुद्ध गरेको हो।
लोसपाका प्रमुख सचेतक परमेश्वर साहले प्रदेशसभा बैठक छलेर अध्यादेश ल्याइएको भन्दै पार्टीले बैठक अवरुद्ध गरेको जानकारी दिए। लोसपाले अध्यादेश पेश गर्न नदिएपछि सभामुख सरोज यादवले बैठकलाई १५ मिनेटका लागि स्थगित गरेका छन्। केही हप्ताअघि प्रदेश सरकारको सिफारिसमा प्रदेश प्रमुख हरिशंकर मिश्रले प्राविधिक विश्वविद्यालय र कृषि विश्वविद्यालयसम्बन्धी अध्यादेश ल्याएका थिए। यसअघि लोसपाले मुख्यमन्त्री लालबाबु राउतको राजीनामा मागेको थियो।
प्रदेशसभा बैठकमा बोल्दै लोसपा संसदीय दलका नेता जितेन्द्र सोनलले साइकल खरिदमा अख्तियारले भ्रष्टाचार भएको पुष्टि गरिसकेकाले मुख्यमन्त्री राउतले राजीनामा दिएर मार्ग प्रशस्त गर्न माग गरेका थिए।
सोनलले मुख्यमन्त्री राउतले विश्वासको मत लिने समय साइकल खरिदमा अनियमितता देखिए राजीनामा दिने वक्तव्य दिएको भन्दै अहिले अख्तियारले पहिलो चरणमा अनियमितता भएको पुष्टि गरिसकेकाले राजीनामा दिन माग गरेका हुन्।
उनले मुख्यमन्त्री राउतलाई मार्ग प्रशस्त गरी साइकल खरिदमा भएको अनियमिततासम्बन्धीमा छानबिनमा सहयोग गर्नसमेत सुझाव दिए।
उनले प्रदेश सरकारले ल्याएका दुईवटा अध्यादेशप्रति आपति जनाए। उनले सरकारसँग विशेषाधिकार रहे पनि प्रदेशसभाको अधिकारको हनन गर्नु लोकतान्त्रिक मूल्य–मान्यताविपरीत रहेको बताएका थिए। उनले प्रदेशसभा बन्द गर्दै ल्याएको अध्यादेशबाट सरकार चलाउनु लोकतान्त्रिक व्यवस्थालाई अवमूल्यन गर्नु र धराशायी बनाउनु हुने बताए।
Discussion about this post