कञ्चनपुर पुस ९ गते ।
कञ्चनपुर जिल्लाको बेलडाँडी, बेलौरी, पुनर्वास, लालझाडी, शुक्लाफाँटालगायतका पालिकाहरुमा किसानले नगदे बालीका रुपमा उखु खेती गरिरहेका छन्। अहिले किसानलाई उखु काट्ने चटारो छ ।
कञ्चनपुरको शिवनगरमा रहेको महाकाली सुगर इण्डष्ट्रिज प्रालि र पुनर्वासमा रहेको सुगर मिलका लागि किसानले प्रशस्त उखु उत्पादन गरेका छन्। नेपालमा उखुको उत्पादन हुँदाहुँदै भारतबाट तस्करी भइरहेको छ ।
भारतबाट उखुसमेत तस्करी हुन थालेपछि नेपाली किसान मारमा परेका छन्। कञ्चनपुरका दुई चिनी उद्योगले यस वर्ष मंसिरदेखि उखु खरिद गर्न थालेपछि भारतबाट उखु तस्करी भइरहेको हो ।
सरोकारवाला निकायकै मिलोमतोमा भारतबाट उखु तस्करी भएर नेपाली उद्योगमा बिक्री वितरण भइरहेको छ । स्थानीय किसानले आफ्नो उखु खरिदका लागि चिनी मिलले आलटाल गरेको तर भारतबाट तस्करी गरिएको उखु खरिद गरिरहेको आरोप लगाएका छन् ।
बेलडाँडीका स्थानीय उखु किसान पदम रानाले भारतबाट तस्करी गरिएको उखु चिनी मिलले किन्ने तर नेपाली किसानका उखु खरिद नगर्दा आफूहरु मारमा परेको गुनासो गर्नुभयो ।
Discussion about this post