खोजखबर संवाददाता सुर्खेत असोज ११ गते । कर्णाली प्रदेश सरकारका वन, पर्यटन तथा उद्योग मन्त्री नन्दसिं बुढाले कर्णालीमा उद्योग खोल्न आवश्यक रहेको बताएका छन् । शनिबार सुर्खेतको वीरेन्द्रनगरमा संचालन भएको सुर्खेत सुपर मार्केटको उद्घाटन कार्यक्रममा बोल्दै मन्त्री बुढाले यस्तो बताएका हुन् । मन्त्री बुढाले भने कर्णाली प्रदेशको समृद्धिको लागि उद्योग खोल्नु जरुरी छ । जसका लागि प्रदेश सरकारले संघीय सरकारलाई समेत अनुरोध गरिसकेको छ ।
रोजगारको लागि पनि उद्योग आवश्यक भएको भन्दै कर्णालीकै कच्चा पदार्थलाई प्रयोग गरि प्रशोधन गर्न सकिने खालका उद्योगहरु संचालन ल्याउन सक्ने हो भने कर्णाली आत्मनिर्भर बन्छ मन्त्री बुढाको भनाई थियो ।
वीरेन्द्रनगरको मुख्य क्षेत्रको रुपमा रहेको प्रगतिनगर टोलमा १२ कट्ठा जग्गा १५ वर्षका लागि भाडामा लिएर निर्माण भइरहेको सुपरमार्केट शनिबारदेखि औपचारिक रुपमा संचालनमा आएको छ । सुपर मार्केटको औपचारिक कार्यक्रममा उक्त मार्केटका संचालक दान बहादुर जि.सी. ले भने, ‘व्यापारिक प्रयोजनका लागि गरिने कार्य सबै नाफाका लागि हुन्छन् यो सत्य हो ।
तर हामीले निर्माण गरेको मार्केटमा कोठा भाडा मुख्य बजार क्षेत्रको भन्दा निकै कम भएकोले उपभोक्ताको हक हितलाई मध्यनजर गर्दै सामान सस्तोमा बेच्न सकिने भएकोले पनि अन्य मार्केट भन्दा सुर्खेत सुपरमार्केट फरक छ ।’ थोक, फुटकर दुबै सेवा सुविधा रहेको उक्त मार्केटमा मासु तथा तरकारी जन्य वस्तु बाहेक अरु सबै बस्तुहरुको बिक्री वितरण गरिने छ । उक्त सुपर मार्केटमा १ सय वटा सटरहरु रहेका छन् ।
१० वर्ष कोरियामा काम गरेको अनुभव र काठमाडौंमा ३ वटा सुपरमार्केट संचालन गरेको अनुभवलाई संगालेर सुर्खेतमा पनि यस्तो मार्केटको खाँचो महसुस गरि सुरु गरिएको संचालक जि.सी.को भनाई छ । उनले भने, ‘सुर्खेत सुपरमार्केट भित्र पाउने हरेक सामानको मूल्य हरेक पसलमा एउटै हुनेछ । जसका लागि राज्यले बनाएको व्यापारिक नीतिलाई अनुशरण गरेर आफ्नै एउटा समितिको निर्माण गरि मूल्यमा एकरुपता ल्याइएको छ । मुख्य बजारमा ८० हजारसम्मका सटरहरु रहेका छन् भने सुर्खेत सुपरमार्केटमा ५ देखि १० हजार मासिक भाडाका सटरहरु रहेकोले पनि त्यहाँको सामान सस्तो पर्ने विश्वास लिइएको छ ।
प्रसस्त पार्किङ्गको व्यवस्थापन भएको उक्त मार्केटमा फेन्सी, रेष्टुरेण्टदेखि डिपार्टमेण्ट स्टोरसम्म रहने भएकोले पनि ग्राहकले खोजेका सबै सामानहरु एकै स्थानबाट उपलब्ध गराउन सकिने जि.सी.ले बताए । उनले थपे, ‘ हिल्सा नाका खुलेपछि कर्णाली प्रदेशका अन्य जिल्लाहरुका लागि आवश्यक पर्ने सामानहरुमा समेत सस्तो पर्नेछ ।’ संचालक जि.सी. का अनुसार मार्केटमा सिसिटिभी क्यामेरादेखि सुरक्षाको समेत व्यवस्थापन हुन्छ भने सरसफाइलाई पनि त्यत्तिकै ध्यान दिइने छ । साथै वातावरणलाई ध्यानमा राखी मार्केट भित्रै एउटा पार्कको समेत व्यवस्थापन गर्ने र हरियाली प्रवद्र्धनका लागि गमलामा विरुवाहरु समेत रोपिने बताइएको छ ।
दशैं तिहार स्किम समेत संचालन भइरहेको सुर्खेत सुपर मार्केटको उद्घाटन कार्यक्रममा ज्योति मगर, रामजी खाँड, शिव संगीतलगायत स्थानीय कलाकारहरुले सांस्कृतिक प्रस्तुती प्रस्तुत गरेका थिए ।
Discussion about this post